养鱼也要有境界

◆ 钱红春

本来认为养几条观赏鱼白相相是个人兴趣爱好，前几日读到朋友唐先生辣微信里发布个《养鱼》文章，觉着养鱼也要有境界嗰。

唐先生从小就欢喜养金鱼。伊读书辰光嫌鄙水壶一样个玻璃鱼缸太小，省下零用铜钿自家做了一只窗格子大小，的角四方个鱼缸，到花鸟市场买来几条金鱼，又从河浜里捞来水草，再到建筑工地拾来鹅卵石，拿鱼缸布置得弹眼落睛。伊讲做功课要是碰着难题，看一歇鱼缸里摇头摆尾个金鱼，心情就会好起来，振作精神继续思考。每趟做好功课，伊侪要对牢鱼缸里个鱼看脱一歇。

退休以后，养鱼成为伊生活中个乐趣。伊勿舍得拿鱼养辣室内，伊要让鱼更加贴近自然，游得自由自在，就辣自家院子里挖仔一只小池塘，养仔廿几条色彩斑斓个锦鲤。伊每趟走到池塘边浪，搿点鱼就会朝伊游过来，抬起头，张开嘴巴，好像勒向伊问好。搿辰光伊是开心得勿得了，啥个烦恼也呒没了。

本来觉得养鱼要比养猫养狗便当得多，读了唐先生个《养鱼》，让我明白养鱼也勿简单。

有一天，绿化工人拨小区里个树喷洒农药除虫，伊院子里个池塘受到污染，养了好几年个锦鲤一夜之间死光了。伊去寻小区物业讨说法，工作人员让伊寻绿化工人。伊一听搿位工人收入勿多，除脱要养家糊口，还要供小囡读书，也勿容易，就放弃了，只关照人家下趟喷药事先关照一声，好让伊有所防备，伊清理好池塘重新养鱼。有一趟发觉鱼少脱了，经过仔细观察，原来是池塘个水位离地面太近，外头个猫来偷鱼吃。伊呒没问是啥人家个猫，而是检讨自家疏忽大意，忘记脱猫是鱼个天敌了。采取措施以后，猫从此吃勿着鱼了。有一天早浪，伊透过玻璃院门，看见有一只白鹭辣池塘边浪，头颈一伸一伸，眼睛盯牢水里向个鱼。伊一看勿对，一边开门一边叫，搿只白鹭门槛贼精，听见声音，马上叼起一条鱼就飞走了。看到搿一幕，伊非但勿懊恼，反而讲现在个生态环境越来越好，连得白鹭个胆子也介大，敢“入院抢劫”了。后来，伊又对池塘取了防护措施，搿点鱼才太太平平。

唐先生辣文章里讲：“养鱼是一种爱好，一种乐趣，还是一种人与自然和谐相处个方式，也是尊重搭呵护其他生命个担当和责任。”

讲得太好了，养鱼虽然是个人爱好搭乐趣，但更加是担当搭责任，就像唐先生一样，辣养鱼当中碰到点意外，碰着点挫折，伊呒没怪三怪四发牢骚，就算看上去是人家个勿对，伊也是从自家身浪寻原因，加以改进。养鱼是搿能，种花种草，养狗养猫也是一样，体现个是文明搭修养。有了搿种境界，勿管种啥养啥，自家侪会变得平和开朗，就像唐先生一样。