咸菜囥进冰箱里

◆ 周云海

弟弟从市郊农家买回一包色泽淡金、口味酸而微咸个咸菜，如获至宝，分送了我一些，老婆开心地囥进冰箱里。现在家家离勿开冰箱，各种食品侪往冰箱里放。勿仅是冰鲜鸡鸭鱼肉，也勿仅是冰激凌啤酒饮料，还有勿想浪费个剩菜，包括以前最勿值铜钿，现在宝贝一样个酸咸菜……于是乎，家用冰箱越来越大，有些人家还用上了冷冻冰柜。

三十五年前，我还呒没结婚，勒了南市区三牌楼路边一家街道工厂里上班。记得厂里有一个叫玉梅个小姑娘，当时结婚流行买冰箱，有一趟下班路浪搭我聊起搿桩事体，讲：“买冰箱有啥用，冰箱里头囥泡饭啊？”一样个街道工厂职工身份，让阿拉两家头对未来愿景和生活想法趋同共鸣。岁月远逝，如果再遇见玉梅，提起当年冰箱有啥用个话题，我想肯定会有勿一样个感觉。

咸鱼翻身，咸菜也能成宝贝。物资紧缺年代，咸菜是当时老百姓饭台子浪常见个家常菜，也是入味个百搭菜，便宜点个有咸菜炒毛豆、咸菜烧豆芽、咸菜煮发芽豆、咸菜豆瓣酥、咸菜烧洋山芋、咸菜烤毛笋、咸菜豆瓣汤，“豪华”点个有咸菜炒蛋、咸菜炒肉丝、咸菜烧乌贼鱼、咸菜大汤黄鱼……

咸菜一般分雪里蕻搭仔咸白菜两种。从前青菜便宜，一角洋钿买五斤。阿拉弄堂里就有人家自家腌咸菜。青菜一棵棵汏干净，沥干，放进一只汏干净个陶缸，放一薄层青菜撒一层盐，再放一薄层青菜再撒一层盐，等到青菜全部放好，就要用重物压紧同时滗脱水分，通常是洗干净脚后反复踩踏，最后用青石压紧、罩布。等青菜腌熟，就可以吃了。

我小辰光有一桩糗事至今难忘。有天早浪，阿爸上班去了，姆妈生毛病睏勒床浪，叫我去光启路菜场买点咸菜回来。我年幼无知，花了两角洋钿，买了一大坨咸菜，姆妈哭笑勿得。其实，按当时物价，买几分洋钿咸菜就够了。

那坨咸菜让一个无忧无虑个儿童走进烟火生活，见证了改革开放前后个巨大变化，以及百姓日渐美好个生活。