画展上，看到伊比利亚火腿

◆ 沈一珠

今年夏天气温特别高，假使呒没必须要做个事体，真勿想出门。前一腔有朋友策划了一个画展，下半天三点钟开幕。朋友讲，有空就早点去，碰个头，吃杯咖啡，所以，提早一个半钟头出发，结果还是候分掐数到嗰，茶歇区域闹哄哄，人坐得拍拍满。

事体是迭能嗰，朋友讲，展馆门口基本呒没办法停车子，所以，顶好覅开车。大概是因为周末，又加上天气勿但热而且闷，还有点乌苏，约好个车子迟迟勿到，勒门口树荫下头立了大概廿分钟，终于等来车子。

司机客气得有一点点过头，坐停当就听伊打招呼：对勿起，让你们久等了……然后讲闲话就像开机关枪：有点远，所以迟到了，天太热，诸如此类……再然后，车子就勒马路浪走走停停，路是有点堵，车子也开得有点黏，嘴巴里继续开机关枪：阿拉只好开右边迭根道，要下高架了……前面卡车开得有点慢……哦，快到了，我送进去哦！覅呀。搿我停停好，交关谢谢。闲话终于结束了。

画展还有一刻钟开幕，就直接进去看画了。作为一个外行，看个是闹猛，张张侪好看。迭个画家勒色彩浪肯定是有天赋嗰，画面浪一块块颜色，有种颜色纯粹干净得来，就像是颜料管里直接挤出来嗰，勿过，又横一笔竖一笔个颜色压下去，有对比也有协调，慢慢就灰出来、静下来，就算还有一点点闹，也因为被大片个安静揿牢，显出静中之闹，让人觉着，假使没有搿点闹就缺了生气。

蛮喜欢一幅半身像，整体看起来暖灰调子，除脱侧面、颈部有点灰白个亮光，其他侪是暗暗嗰，暗部个暖红，反光部个灰蓝，涂涂抹抹潽进潽出，眼前迭个中年女人沉静又温和、睿智又低调个气质。再看，题目就叫《女学者》，搿就对了。

展馆勿算大，兜了两圈，看了两遍。想出去坐一歇，结果靠窗个咖啡座已经坐满，看起来侪是斜气有气质个男男女女；一个厨师打扮个年轻人立勒人群中央一只茶几前，手里端仔一只火腿，一片片批出薄片，叠放勒餐盘里，伊比利亚火腿片迭种深红色跟灰白色夹花嗰，好看得也像画一样。勒一片轻叹声里，年轻人笑得像朵花一样。场面很养眼，画出来就是一幅人间烟火。

近几年伊比利亚火腿蛮流行，交关地方有卖，一片片批好，打开就好吃。假使屋里正好有，倒可以试一试迭道伊比利亚火腿塔。又闷又热个天气里，弄一点好看又好吃嗰。

材料：伊比利亚火腿片、面包片、哈密瓜、色拉油少许。

做法：面包去硬边，切成长方小块，刷橄榄油，入烤箱，180摄氏度烤五六分钟，烤脆；哈密瓜（呒没哈密瓜，用黄瓜切成片也可以），切成面包块大小，叠勒面包浪；牛油果斜切成片，摆勒哈密瓜片浪；拿出伊比利亚火腿片，旋成一朵花个样子，放勒牛油果片上。

好了，再加一大杯拿铁、一大盆西瓜，今朝中饭就迭能样子了，哎呀，热天呀……