陶公山下印糕香

微信扫码看视频听钱程沪语朗读

◆ 周爱民

姆妈100岁了，伊老家勒宁波陶公山。小辰光，我最欢喜跟伊去宁波看外公外婆，因为伊面有陶公山，有东钱湖，还有外婆做个印糕，又香又好吃。

1962年放暑假，姆妈带我从十六铺乘海轮去宁波。迭一天外公租了一条小船，勒了东钱湖旁边接阿拉上船。摇橹个船公搭外公是一个姓，也姓忻，一路浪向搭外公聊乡里头个事体。我坐勒船边浪，拿手插到湖水里，一看到水泡泡就瞎想：水里阿会得跳出一条大鱼来啊？船工指指我：搿小娃儿肯定蛮皮噢。姆妈回答：伊爬树、打弹子、刮刮片，是“皮大王”。

我辣末生头问外公：外婆做印糕了口伐？姆妈用手指勒我额角头浪弹了一记，畀我吃了一记“麻荔子”，笑嘻嘻讲：侬搿个小馋痨坯……又过了两个钟头，终于看到了陶公山，也看到了山脚下外公外婆个房子。

吃过中饭，姆妈边收拾碗筷，边搭外婆讲上海屋里向有趣个事体，忽然看到有三三两两个青年学生从门前走过。外公告诉阿拉：陶公山浪有一个新建个宁波师范学院，有交关学生住勒了山浪。正勒了讲，山顶浪传来乐器演奏搭仔朗读个声音。外公看我坐勿停立勿停，晓得我想出去白相了，就带我去爬陶公山。

陶公山一百多米高，有一条弯弯曲曲个山路，路边花花草草长得密密麻麻，小鸟勒了树荫里飞来飞去，空灵个鸟鸣搭仔新鲜个空气让我变得兴高采烈。一歇歇就来到了山顶，看到了一幢五层楼个教学楼，旁边操场浪有勿少学生，更多个学生勒了教室里看书。我就摇摇外公个手，问：啥辰光我好跟伊拉一样大呢？外公摸摸我个头，笑了。

辰光过得真快，姆妈要回上海了。跟以往一样，外婆拿出一盒自家做个印糕让阿拉带回去。

印糕据说跟大文豪范仲淹有关。范仲淹勒了小个辰光，屋里向交关穷，就拿热粥盛到盘子里，等冷了，结冻了，再划成小方块，夜里向读书肚皮饿了就用来充饥。伊个好友石梅卿模仿范仲淹个做法，用米粉加糖做成糕，后来就流传开来了。

做印糕个主要原料是早稻米、黄糖、松花、芝麻。先要拿粳米放锅子里用小火炒热，到米粒变成淡棕色就可以了。炒熟个粳米冷却以后，加黄豆搭仔一点芝麻，磨成粉。用小火熬制成黄糖汁，拿糖水跟米粉拌匀做成糕粉，糕粉勿能太湿也勿能太干。拿糕粉撒到染过松花粉个印模里，压紧，刮去多余糕粉，倒出印糕坯子。

最后一步是烘印糕。外婆会从灶膛里向拿出滚烫个稻草灰放勒了“火缸”里，“火缸”上面放一张铁筛，铁筛上头放一张纸头，再拿印糕坯子整整齐齐放勒纸头浪。接下去需要烘烤八个钟头，正好天也黑了，困一觉，第二天一清早就可以吃了。印糕图案清爽、香气扑鼻，我拿起一块咬一口，松、香、甜，太好吃了！外婆笑眯眯坐了旁边，满脸慈祥。

六十多年过去了，当时陶公山下个情景好像就勒了眼前。