夏日记事

◆ 钱红春

我廿几年前买了现在个房子，当时周围还是一片农田。呒没想到只过了几年，周围就大变样了，尤其是离阿拉屋里一站路个地方，先后开出好几家商场。亲眷朋友侪讲阿拉有眼光，选了一块“风水宝地”。

现在年纪越来越大，腰腿勿像老早活络，而且已经习惯网购，交关辰光呒没去商场了。搿天听邻居讲，最近商场里变化蛮大，心又痒了，就选了个好天，两家头相互搀好，笃悠悠去逛商场。

商场个变化的确蛮大，新开了电影院、儿童乐园，还有老字号点心店现做现卖，特别是新开好几家老年用品专柜。我搭老伴吃吃逛逛，勿知勿觉天就暗下来了。我看老伴有点吃力，就讲：“阿拉叫部车子回去？”老伴朝我翻翻白眼，讲：“一塌刮子一站路，还要叫车子啊？”我连忙改口：“葛末就乘公交车。”看老伴勿响，我就牵起伊个手朝公交车站走。

一歇歇工夫，阿拉要乘个公交车就进站了。我扶牢老伴稍微靠后立好，让人家先上车，防止拨碰着掼倒。等到上车个人少一眼，一位背双肩包个男青年客客气气让我搭老伴先上，我轻轻交搭伊讲：“阿拉只乘一站路。”男青年晓得，只乘一站路，晏点上车，下车方便。男青年上车以后，还回过头来看看，正好看到我勒车子下头推老伴上车，马上伸手拉一把。司机也一再关照：“老人家当心点，勿急勿急。”我搭老伴上车后刚刚立稳，就听见司机喊：“请大家帮帮忙，拨两位老人让个座。”老伴连忙摇摇手讲：“用勿着，用勿着，阿拉只乘一站路。”搿辰光车厢里传来一声：“快点立起来，拿座位让拨阿爷阿奶。”原来是一位年轻妈妈一边立起来，一边叫儿子让座。我连忙对伊讲：“阿拉只乘一站路。”为了证明自家勿是瞎讲，我还拉老伴靠到车门边浪。

车子到站。我搭老伴下车后，慢慢交朝自家小区走。侬一句我一句讲起新变化。我问老伴：“侬觉着口伐？今朝还有一个变化。”呒没等老伴开口，我就讲，刚刚乘公交车辰光，虽然只有一站路，但勿管是乘客还是司机，对阿拉老人更加关心了。老伴讲：“是个呀。”接下去就问我：“侬晓得口伐，刚刚一对为阿拉让座个母子，一直立到车子要靠站快，确认阿拉是真个要下车才坐下来。”

一站路交关短，一片情斜气长。