四季豆洋葱炒饭

◆ 沈一珠

搿几天像煞风凉一点了，早上10点钟左右出门，居然淋着几滴雨，也勿晓得是哪一片云里飘来嗰。

今朝早饭以五谷主食为主，绿豆粥、红糖发糕，乳腐、酸黄瓜过过，比较特别个是厚蛋烧，两只蛋、一小杯牛奶、盐、前两天做杨枝甘露多出来个西米露——吃勿光就冷藏勒冰箱里，可以保质保鲜两三天——舀三四调羹到碗里，跟蛋一道打匀。其他倒呒没啥，味道也就是鸡蛋个香味道，就是冰勒碗里轧仔一堆彼此黏糊了一道个西米露，勒厚蛋烧里倒变得自由散漫了，一边吃一边有透明“露珠”一粒粒无声无息落下来。想想蛮好白相，大概是调了环境，水土勿服，人迭能，食材也迭能。

写到此地，考古一记：小辰光作文课浪向，老师看到关于自由散漫西米露迭段，肯定要划出来表扬一记，讲此地用了拟人化手法，小作文因此有了生趣。

继续翻书。《美食课2》，作者徐文兵，还是抄一段徐医生直别别勿打弯个闲话：

“为什么要吃五谷？中医认为，植物会把它最精华的东西都储存在自家的种子里，因此它含有中医概念里的精气神的‘精’，而这些精在植物的根、茎、叶、花、果里的含量不如种子里多。”

“如果怀孕的母亲钙补充不足，为了保证孕育的胎儿不缺钙，母体会从自己的身上脱钙，来补充胎儿营养。因此，这时检查母体会发现可能缺钙，但是胎儿不缺。”

看出来了，五谷了不起，跟母亲一样了不起。

想起一个同学，生勒海边，长勒海边，每次跟伊一道吃饭，基本以海鲜为主，结果，阿拉迭种苏州河边长大个上海人，以补足了蛋白质为理由统统勿吃饭了，只有伊，雷打勿动，扑扑满一碗饭夯下去。一记头觉着，伊是用实际行动阐述了徐医生讲个道理：“如果不吃主食，肠道菌群就活不了，也就吸收不了蛋白质。”

讲回今朝，主食是一小碗四季豆洋葱炒饭：

四季豆、洋葱切成丁，油镬里一道煸透，饭摆下去，加适量盐，翻炒均匀，盖镬盖焖一歇，一直到饭菜相互融合亲密无间就好。

至于配点啥蛋白质、维生素，随便。