苏州河浪个“时光坐标”

微信扫码看视频听钱程沪语朗读

◆卢忠雁

苏州河弯弯曲曲穿城过，河面浪架起一座座桥，像串牢上海岁月个珍珠，江宁路桥就是其中一颗带仔“铜钿气”个珍珠。老上海侪欢喜叫伊“造币厂桥”，搿名字一出口，就晓得伊跟上海造币厂简直是从小到大个“老邻居”呀！

讲起搿座桥，可以追溯到96年前，当时搿块地方已经斜气闹猛，工厂一家接一家，路边商铺连成一片，路浪黄包车、卡车、挑担子个行人，天天轧得水泄不通。苏州河北岸个中央造币厂，跟戈登路（现在个江宁路）隔仔一条苏州河，运原料、运成品侪靠船，碰着刮风落雨，斜气勿便当。1929年，一座5孔木桥终于辣造币厂旁边立起来了，官方叫伊“造币厂桥”，老百姓喊伊“洋钿厂桥”，一听就是满满个烟火气。

可惜木桥经勿起折腾，到1949年4月，桥身木头腐烂发黑，车轮一压就摇摇晃晃，路过个人侪捏把汗。呒没办法，相关部门只好辣老桥西边大概20米个地方，新造一座木桥，长50多米、宽5米多，名字也改成了“江宁路桥”——搿个名字也就叫到现在。

到了1968年，江宁路桥终于“脱胎换骨”，从木桥变成钢筋混凝土桥。长度拉到316米，宽19米，车行道有14米宽，可以让两部卡车并排开，两边还有2.5米宽个人行道，街坊邻居有空侪欢喜到桥浪散散步。到了2002年，搿座桥再次被贴上了“危桥”标签，从2009年起，只让小轿车、脚踏车搭行人过，卡车勿准走了。

2011年12月2日，江宁路桥正式“歇业”，就要拆忒重建。交关老街坊特地来看，还有人为伊拍照留念。还好新桥造得斜气快，2012年4月动工，5月底防汛墙搭桥基就弄好了，8月底大梁全部架好，11月底铺上乌黑发亮个沥青，12月22日就重新开张迎客！

现在个江宁路桥，全长近588米，主桥318米、宽22米，16米宽个车行道，设3根车道，还有一条会变方向个可变车道，上下班个车流顺畅交关。桥面铺个新式高弹性沥青，降噪防滑，落雨天车子开过也勿会得溅起水花。桥个两边花坛还有花纹，比以前真是精致交关了。

最亮眼个是2023年新增添个景观灯。平常日脚，桥底是淡淡个蓝色，倒影像苏州河里个姐妹，形影不离；一到节假日，游船从桥下过，互动投影就会冒出金颜色个粒子，经常能看到路过个人停下来用手机拍照，侪讲迭座桥现在好看得像一幅画。

现在立辣江宁路桥浪，南边是江宁路澳门路个热闹商圈，北边是光复西路造币厂个老建筑，车子快速过，行人慢慢走，一快一慢之间生机勃勃。搿座桥从木桥到钢筋混凝土桥，再到现在颜值搭实力并存个新桥，就像苏州河浪个“时光坐标”，记着老上海个故事，也陪着新上海一道往前走。