菜肉馄饨鲫鱼汤

◆ 沈一珠

重阳已过，窗外仍旧日光曜曜，还有热天个味道，今年个秋天尴尬得有趣。

今朝寻个秋味，河鲫鱼汤加菜肉馄饨，是有客观和主观两个原因。

主观上，古人讲，“霜降水反壑”，意思是霜降以后河流进入枯水期。想想，大自然和人个内在逻辑是差勿多个，所以，生理反应也是同步个：搿段日脚里，人会觉着干，河浜里水干了，人体也缺乏水个滋养。所以，及时吃点鱼汤，滋养心、肝、脾，身体要准备过冬了。

客观上，阿拉屋里辣平台买菜表现良好，平台送了一条河鲫鱼。从前碰着迭种情况，会另外准备一盒男豆腐——专门问过营业员，为啥要叫“男豆腐”，为啥呒没“女豆腐”？结果伊拉也勿晓得；或者就是准备好水萝卜，迭两样食材是河鲫鱼烧汤个绝配，侬想想看呀，人体缺水，烧锅汤，再加上水萝卜、水豆腐，阿是超强补水？侬再想想看，萝卜、豆腐里阿是大部分侪是水分啦？

烧鲫鱼汤关键是处理鱼，否则会有点腥气。鱼汏清爽，用盐、葱、姜一道腌半个钟头，再汏清爽沥干，顶好再用厨房纸拿鱼身里个水掖干。虽然补水是今朝个主题，但鱼身体里个水分要尽量掖掖干，否则煎鱼辰光要溅油，还容易搭底；再加上，鱼身体里水分过多，肉质会勿够Q弹。

开油镬，热锅冷油，河鲫鱼煎到两面焦黄，淋点黄酒焖一歇歇工夫，再加烧滚个水，大火烧到鱼汤发白，加“男豆腐”或者萝卜丝，烧到鱼酥汤软，合好咸淡，撒胡椒粉和葱花就好端上来喝汤吃鱼。不过，搿两年特别，屋里住了老姆妈，伊讲，鱼勿但营养好，还比肉好吃……不过，就是，鱼骨头鲠喉咙里吓煞人……

好吧，要有营养，又要好吃，还要避开鱼骨头，有句闲话叫办法总比困难多——鱼汤烧好，一条鱼捞出来，配糖醋葱姜汁，勿怕鱼骨头个人吃鱼，鱼汤滗出来做底汤，一人下一碗菜肉大馄饨。

至于菜肉大馄饨辣阿拉上海人心里向个江湖地位，最近有一部即将上映个电影《菜肉馄饨》可以做证。