老早乘过个公交车

◆钱红春

1958年，我辣中山北路近武宁路个一所中学读书。升到初三辰光，屋里搬到龙华路鲁班路了。本来想转学，领导讲有规定毕业班勿好转，乃末只好天天从当时上海市区个南面跑到北面去读书。还好当时有趟45路公交车，从曹家渡开到半淞园路江边码头，正好经过阿拉弄堂口。我每天一早就乘搿部车到曹家渡，再步行到学堂；放学再原路返回。

埃歇辰光个45路是老式公交车。车厢小，座位是贴牢车壁个长条木凳。早高峰辰光，乘客拼命轧进来，坐辣凳子浪个乘客只好两只手撑牢自家膝盖，再拿肩胛拱起来，才能保留一点透气个空间。

搿种老公交只有一扇底下带滑轮个移门，门边有只拉手，拉手下头是锁，锁里向有只钩子——关门辰光，门跟门框一碰就锁牢了。开门辰光，售票员拿一把“L”形钥匙插进锁眼，转九十度让门脱钩，再推一推就开了。覅看门锁简单，开关起来斜气吃力，特别是车门被车厢里个乘客顶牢，售票员每趟开门侪要用足力道。乘客上车后关门更难，每站侪有人“吊车门”，售票员要请车站浪个人帮忙，拿吊车门乘客露辣车门外个背脊、脚跟、包袋往车厢里推，车门才关得拢。

对售票员来讲，开门关门还算简单，要辣轧满人个车厢里卖票更加困难，勿但要哇啦哇啦喊，还要辣人堆里轧来轧去，啥人买过票，啥人呒没买票，侪靠记忆力。

当时我同学屋里有台矿石收音机，我也想自家装一台，但是钞票从啥地方来呢？爷娘收入勿高，还有好几个弟妹，经济负担斜气重，我想来想去，只好从“脚路钿”（交通费）里省。我从屋里乘车到学堂，本该买一角五分个票。早浪辰光紧，车钿省勿出；放学就好办了——买五分或一角个票，少乘几站，走回屋里。既能一路看野眼，又能省车钿，一举两得。

有一趟放了学，我从曹家渡上车买了一角车票，本该乘到肇嘉浜路大木桥路下车。呒没想到上车以后辣座位浪睏着了。等我醒转来，发现已经过站了！我连忙要下车，拨售票员一把拉牢：“乘过站了，补票！”原来我天天乘45路公交车，售票员已经认得我了——我买几钿车票、该到啥地方下，伊记得清爽。我赶紧解释：“我勿是有意个呀，从来呒没出过搿种事体！”还好售票员看我初犯，又是“老乘客”，讲了句“下趟当心点”，就放我下车了。

就搿能每天五分一角攒下来，我总算自家动手装成了一台矿石收音机。

我乘了近一年45路。一晃六十多年过去，搿条线路号头呒没变，路线也呒没变，就是车子变得现代化了，一路浪个风景也变得老好看了。