2024年06月23日 星期日
克罗斯的退役 赵本山观战“CBA春晚” 国米变换大王旗 不跟体育盲生气 追兵集体稍息
第A02版:专栏 2024-05-24

国米变换大王旗

娄一晨

娄一晨

前天,我正好去上汽浦东足球场现场转播。刚在车库里停好车就遇到某媒体友人,结果就聊起了最新鲜出炉的国际米兰俱乐部易主的消息。

友人:阿娄啊,今朝最新个消息,国米老板调人来……美国资本直接掿脱俱乐部99.6%个股份!结棍是真结棍!阿拉苏宁张老板张公子就搿能退出了咯?

我:唉,是额呀,从2016年6月份苏宁宣布收购成功到现在,差一个号头就满八年了……苦啊……

友人:我看到新闻里厢讲张公子是问美国资本借了一笔三年头额资金,到期了还勿出。再寻市场廊厢其他人家借钞票根本借勿着。哪能会哦啦?

我:兄弟啊,资本运作额事体啥人讲得清爽?我只晓得是三年前头2021年5月份,张公子当时寻到迭家美国资本叫啥橡树资本,问对方融资2.75亿欧元。但是融资协议里厢条件非常苛刻!啥额每年利息要12%咯,苏宁掌握额俱乐部68%额股份全部要抵押拨对方咯……条件老吓人呃……

友人:勿止68%,新闻里讲连得第二大股东手里厢额31%也一道抵押拨迭额橡树资本来……

我:对额,我也是今朝看了新闻才晓得原来有介许多股份侪抵拨人家了……所以,可想而知当时辰光国际米兰俱乐部额财务状况已经差到了啥程度。否则啥人肯硬了头皮接受美国资本开出来迭能介额条件?

友人点头:呒错,搿种介条件简直就是掿人往死路里逼……为啥当时辰光勿索性就捺俱乐部卖卖脱呢?就算是出血割肉,总比现在血本无归好啊?

我苦笑:老兄啊,迭额侬叫我哪能讲法?回到八年前头,张老板张公子真金白银2.7亿欧元收购国米68%额股份,接下去到2021年寻美国资本融资之前,又投进去多少钞票来维持俱乐部运营,工资、奖金、差旅、转会费……所有搿眼开销加了一道一共多少?资本市场当时对国米俱乐部额整体估值肯定要比张公子额心理价位差交关,勿是差一点点……

友人沉吟片刻:侬觉着搿家美国资本阿是有啥阴谋?我看网廊厢有好几篇文章侪是迭能讲呃……勿管哪能,国际米兰最近几年成绩还是可以额,八年里厢七只冠军来……

我大笑:哈哈哈,老兄啊,啥地方有介许多阴谋啦?当时辰光是侬寻上门去求人家呃呀。至于掿冠军,跟融资借钞票搭界勿啦?融资协议里写过侬必须要掿几只冠军?两桩事体……

放大

缩小

上一版

下一版

下载

读报纸首页