吃碗咸浆当夜饭

文并图/沈一珠

屋里门口有一爿购物中心，里向新开一家点心店，大饼油条粢饭糕，也有排骨年糕小笼包，勿过，顶顶吊牢人胃口个，可能就是一碗火热踏踏滚个咸浆了。

特别是搿两日，路灯亮起来个辰光，人辣外头做好事体，正要回转去。地铁口出来，有夜风轻轻吹过，后背心觉着有点点瀴丝丝，想想，回到屋里还有一小段路要走，勿知勿觉就弯进店堂间了，先来一碗咸浆，垫垫饥。有辰光，索介再加一块粢饭糕，或者一块炸猪排，搿天夜饭也就解决了。

豆浆窗口辣顶顶靠里向，拿小票朝一只架子上头一根钉子浪一插，招呼一声，就有人过来了：窗口里向靠墙一排搁板上头，有六七只，或是七八只调料碗，有辰光是老伯伯，有辰光是小姑娘，一手拿一只空碗，一手拿每种调料侪朝碗里向放一眼；然后，打开保暖桶盖头，舀一勺子豆浆，高高举起，冲进碗里。放到托盘里个辰光，原来丝光滴滑个豆浆，眼睛一眨就已经起花了。邪气烫，一调羹一调羹慢慢交吃，吃到最后一口辰光，也已经冷脱了。

可能是因为价钿还算接地气，所以，店堂间里总归坐足坐满。搿天夜里，坐辣斜对过有一个小姑娘，妆化得相当精致，眼睫毛一根根立起仔，闭上闭落老有质感个样子。伊一直辣自拍，横一张竖一张。忘记脱看伊辣吃点啥，也勿重要，反正伊主要是来拍照嗰。

快吃好辰光，进来一对中年人，应该是默契了一辈子个上海夫妻。男人先坐下来，顺手从袋袋里摸出一小瓶药，倒两粒出来，朝嘴巴里一厾，吃口水，咽下去；女人先领了一碗咸浆，摆到男人面前；再领一碗甜浆，自家再坐下来。等一歇，听到叫号头，新鲜油条炸出来，女人豪忄叜立起来，走过去拿……

蛮有意思，迭个世界，有种事体一成勿变，也有交关事体辣发生改变。就像某个夜到，有人拿从前个一顿早饭变成功夜饭。