老底子汏浴是桩麻烦事

文/吴 毓

现在天气一冷，交关人汏浴个频率反而增加了，天天汏浴，清清爽爽，轻松适意。我勿由想起老早子汏浴真是一桩麻烦事体。

埃歇辰光大家屋里呒没热水器、浴霸、空调、地暖之类个取暖设备，冬天汏浴只好到公共浴室里解决，一般一个礼拜能汏一趟浴就算邪气讲究了。我工作个单位里有一只小浴室，每个礼拜对员工开放两次。记得有一年我刚刚生下儿子，三个月大个儿子就放辣单位办个托儿所里。到了浴室开放个日脚，下班铃声一响，大家每人拿只面盆去浴室门口排队，我也拎了一只面盆匆匆忙忙赶过去，先拿面盆放了地

浪占一只位置，马上转身奔到托儿所抱儿子。儿子抱到浴室里，一长排莲蓬头齐刷刷喷出热水，下面汏浴个人邪气多，挤来挤去，肥皂泡沫四溅。我托要好同事帮忙抱一歇，自家先胡乱冲洗一番，再从同事手里接过儿子，帮伊汏浴。

埃歇辰光汏浴像打仗一样，通常每只莲蓬头下头侪有两三个人一道轮流汏。一个人辣莲蓬头下面冲洗，好几个人辣旁边排队，边抹肥皂边搓洗。我手忙脚乱帮儿子汏好，用浴巾一包到外头换衣间里穿衣裳。

当年一到冬天，大家为了保暖，身浪穿个衣裳邪气多。我一手抱起包得像粽子一样个儿子，一手拎起面盆，背后背一大包替换衣裳，吭哧吭哧步行一里多路，回到屋里已经精疲力竭。可以讲，当年每趟到单位浴室汏浴侪是一桩老辛苦个事体。

后来儿子进了幼儿园，伊汏浴个事体就由老公承包了。伊通常会辣每个礼拜六吃过夜饭，骑脚踏车带儿子去娄山关路公共浴室汏浴。进了浴室，老公先帮儿子汏，等伊汏好了，就犒劳儿子一瓶桔子汽水。等儿子辣公共浴室个躺椅浪安安静静享受汽水了，老公才能安心进浴室自家汏浴。几十年过去了，跟儿子讲当年个事体，伊仍旧记得清清爽爽，因为搿是伊最开心个辰光。

现在每家每户侪有设备齐全个卫生间，要冲淋有淋浴房，要泡澡有浴缸，甚至有些家庭还安装了豪华按摩浴缸、桑拿房、木桶蒸浴等，汏浴已经变成一桩交关方便和惬意个事体，再也用勿着费劲奔波去公共浴室。“世事如棋局局新”，阿拉市民个生活也像芝麻开花节节高。