修车小弟个人生哲学

文并图/沈一珠

早浪出门，发现汽车轮胎有点瘪，就到门口修车行去打气。修车行里个老师傅看起来有点气呼呼，一边讲：“汽车倒倒好，”一边拎仔打气工具走过来，打气。

现在修车行里大多数侪是小年轻，十几岁、靠廿岁。三十几岁就可以称老师傅了。勿像从前，路边修脚踏车个大多数是五六十岁老伯伯，甚至看起来年纪更加大一眼。当然，整天油渍麻花做生活，再加上晴天太阳晒，刮风吃风沙，勿老也老了。

气还辣打，从后视镜里看到，老师傅蹲辣海做生活，一个小弟走过来，轻轻戤了老师傅身浪，讲：“阿哥，侬肚皮饿口伐？”老师傅勿睬伊。小弟一付无赖样子，又讲：“阿哥，侬想吃点啥？”老师傅仍旧勿睬，面孔浪好看点了。

小弟仍旧勿放弃，又辣老师傅身上蹭了蹭，再讲：“阿哥，真个呀，侬想吃点啥啦，我帮侬去买？”

一而再，再后头呒没三了，老师傅已经呒啥脾气了，一边收打气工具，一边讲：“老板不辣海，小鬼头就偷懒，侬像样子口伐……”三言两语，大约模想得出发生啥事体了。汽车修理场，也是职场，职场里个事体，总是活色生香嗰。

迭个小弟上趟碰着过，靠廿岁样子。因为不晓得为啥，车子轮胎浪插了把刀片，就去补胎。算是小生活，老师傅安排小弟做。

我看伊一副呒没困醒个样子，就寻伊讲讲闲话：“小弟，侬看看，搿是勿是故意破坏啊？昨日夜里，车位呒没了，就随便寻了只别人家个车位停了一夜天。今天早浪开出来，就发现搿把刀片了。”

小弟仍旧死样怪气，讲：“喏，刀片拨侬，侬试试看戳得进口伐，戳坏轮胎赔钞票算我嗰。”

哦哟，拨小弟冲得一口气憋牢，一面孔尴尬。小弟倒是醒了，越讲越起劲：“就是碰巧了，路浪正好有刀片，车子开过去，前胎先碰着，力道、角度被碰得正正好，后胎轧过来，就戳进去了，所以，常常是后轮胎被戳，刀片、钉子、塑料片，我样样侪见过。还有，不要拿人往坏处想，想多了，自己也呒啥好。再讲，侬也就占了人家车位一夜天而已，下趟不占就好了。大家侪是普通人，不会无缘无故去为难另一个普通人……”

搿天补好轮胎回转去，我也思考了一下人生。又想想，小弟人小，道理勿小。