去松江雕花楼看看

文/许德华

呒没想到松江老城迭能好看！

看了今年9月1日个夜报介绍“最美雕花楼修缮后重新开放”，就想要去看看，前几天天气晴好，勿热勿冷，乃末决定出行。先乘地铁9号线，再调松江5路公交，轻轻松松就到了中山西路266号雕花楼。搿座楼是清朝嘉庆年间当地名绅杜岭梅个房子，前楼、走马墙、后屋和厢房个窗棂门档经过两百多年个风吹雨打保留至今，仍旧邪气好看，是松江地区少见个建筑雕刻精品。东门径墙篱浪还有戴望舒个“雨巷·丁香姑娘”长诗。

作为松江区非物质文化遗产传习基地——雕花楼里有顾绣、草龙舞搭仔余天成堂中药、竹编等遗珍个展示。我搿趟还有只收获是根据搿里提供个“漫步松江街区，阅读建筑之美”活页册，轻松游览了雕花楼同一地段个张氏米行、王氏馆、有明堂、土布馆、大仓桥和灌顶禅院。

明清时期松江是漕运重镇，粮食仓库造仔交关，因此松江当时也拨叫做“仓城”，当地勿少地名里侪有一个“仓”字。

大仓桥下有孟姜亭一座，南石柱上联：青石有情怜弱女，寒衣无处觅离魂。北石柱下联：万里奔波殉夫节，一声恸哭倒长城。

老早一直以为四大传奇中个孟姜女是北方姑娘，搿趟晓得了伊原来是华亭人氏（今松江区）。孟姜女千里寻夫就是从今朝松江老城仓桥下划船北上嗰。

中山路浪还有两座以松江别名“云间”彰显个古迹：一是中山西路和玉树路交接处新城水云间（居民区）内个“云间第一桥”，伊原型是明朝时最大个石桥。桥下汩汩流水好像辣讲述松江才俊陈子龙抗清义举，伊宁死不降，押解途经云间第一桥时，纵身跃入河中自尽（陈子龙墓现在松江广富林）。

二是中山东路“云间第一楼”，伊原来是古时松江府衙门个瞭望楼（谯qiao楼），现在是松江二中个校门。

参观雕花楼还连带看了好几个底蕴深厚个景点，像蓝印布馆手织布成品邪气好看，有只花格小布袋成了我个纪念品。

松江老城一来交通便利，景点多距离近；二来“先有松江府，后有上海滩”，此地看得到观音兜山墙木板民居、石头桥等古意建筑；三是乔木多，辣王氏老宅我到第一趟看到枣树，结青果落到地浪就变红。路边大树浪结了勿少荚，地浪还有交关硬壳，用手机“花伴侣”软件辨识，上海市中心蛮难看到个“枫杨”。

松江雕花楼以及周围景点让阿拉搿种中老年人一日游还是蛮有趣嗰！