胡萝卜油炒黄芽菜

文并图/沈一珠

天气越来越热，一时头里，人懒洋洋呒没精神，胃口也恹恹交勿开。平常日脚一碗白粥，半爿咸鸭蛋，再加一碟咸中带甜个玫瑰乳腐，稍许可以让人提一提精神；又或者懒得开伙仓，索价随便荡到弄堂口面店里，一份冷面加一碟清炒绿豆芽浇头，一筷子爽脆，总算可以解脱一分闲愁。

只勿过，平常人过日脚，既勿可以日日白粥腐乳，也勿可以天天进饭店——毕竟，疫情还呒没过去，安全、营养是头等大事。所以，辣一只视频里看到迭只胡萝卜油炒黄芽菜，就邪气欢喜。

首先伊是素菜，大热天里看见荤腥呒没胃口辰光，素菜倒是清清淡淡让人开胃。虽然对交关上海人来讲，胡萝卜已经属于“冷宫菜”，勿过用胡萝卜爆香个油的确有一种特别个香味。

其次，迭只菜弄起来便当，烧烧5分钟，准备也就廿分钟左右。毕竟天热了，动一动一身汗。

用料：胡萝卜50克左右、黄芽菜叶子200克左右。

辅料：油、盐、生抽、花椒、姜丝、香菜梗、葱花各若干。

做法步骤：

1.胡萝卜、生姜切丝，黄芽菜叶子扯小。

2.油入锅烧到6、7成热，胡萝卜丝摆进去煸透，捞出来。

3.胡萝卜油倒出，剩稍许底油，煸香花椒后，放入黄芽菜叶子，加盐，翻炒片刻。

4.加入葱花、姜丝及胡萝卜油，翻炒到黄芽菜叶子软熟；再加入香菜梗、胡萝卜丝，翻炒均匀后，就可以出锅了。