巧遇箍桶店“小开”

文/侯宝良

老早箍桶店生意蛮好，现在后生家勿晓得啥叫“箍桶”。今朝我顺便讲讲箍桶店“小开”个故事。侬听听就晓得箍桶个事体。

老底子日常人家侪离勿开“桶”，蒸饭用饭桶，汏脚用脚桶、汏浴用浴桶……搿眼桶侪是箍桶匠用一块块木板圈起来，再用铁圈箍牢，迭种店家就叫“箍桶店”。

上海人称“小开”一般是指店铺老板个儿子，我讲起迭家箍桶店小开，原本勿是老板儿子，是箍桶店里“学生意”（学徒）个小年轻，做事体蛮“巴结”（勤劳）。伊正好姓“凯”，邻舍道里、上门熟客侪叫伊“小凯”，刚巧跟“小开”同音，勿晓得个人还以为伊是老板个儿子。辰光长了，老板只有一个独养囡，看小凯做事体认真、人又老实，也想寻个将来照顾店面个人。有趟问小凯是否愿意做“招女婿”？小凯爷娘过世早，想想老板对伊勿错，教手艺尽心尽力，伊搭仔老板一家门也有了感情，就同意了老板个提议。迭能一来么，“小凯”正式做了“小开”。

箍桶店生意就此由小开来管，伊为人实在、手艺勿错，生意自然蛮好。箍桶店除脱做常规脚桶、马桶，更多是定做特殊规格个木桶，像椭圆形个腰子桶、茶壶保暖个茶壶桶、腌咸菜用个水桶……另外，还有交关小修小补生意，比如换木板、换桶箍、换拎攀咾啥。

记得小辰光我经常到伊店里白相，叫伊小开爷叔，看伊做各种各样木桶。其实箍桶个技术邪气复杂，辣规定个圆周里计算用几块木板、勿同形状个桶需要制作勿同形状个木板，最后拼起来要严丝合缝。尤其是客人定做高档木桶，还要有精美雕刻，再请油漆师傅上漆、描金，做出来成品就像工艺品。

后来有了塑料马桶、搪瓷水桶、配玻璃内胆个搪瓷保温桶、铸铁浴缸……小凯迭种箍桶店个生意越来越差，有一年冬天无声无息关脱了。

前几年，我辣近郊古镇碰巧看到有爿箍桶店，橱窗里陈列勿少马桶、脚桶、茶桶个模型，看上去蛮有趣，老板年级勿大，就搭伊攀谈起来。小老板讲现在主要做时尚个泡脚桶，搿排模型侪是伊阿爸做白相嗰。正辣讲话辰光，店堂后头走出来一位老人，看起来有点面熟陌生。我仔细一想，倒想着了：“侬是，箍桶店小凯！”小老板奇怪问爷：“阿爸侬认得伊啊？”迭位老人激动讲：“哪能会勿认得？是阿拉老早老邻居啊！”