秋葵，有点黏滋疙瘩

文并图/沈一珠

白露已过，夏季风慢慢交被冬季风代替，冷空气转守为攻。虽然暑热已经到了末尾，但是天气仍旧有点闷，夜里吃食就清爽点。烧一镬子清粥，一条8两左右个白水鱼，汏清爽，轻轻交暴盐腌；蒸之前，加一点点糖、淋一点点蒸鱼豉油，几片姜几根葱，大火蒸10分钟就够了，新新鲜鲜个味道，闻之生津；蔬菜是芥末秋葵片，焯熟之，横切成片，一只只绿色个五角小星星，黏滋疙瘩，是秋葵自带个果胶，蛮有意思，植物个营养投喂总是各有各个姿态；一点点芥末，一点麻油、生抽和盐拌匀了，再跟小星星一道拌均匀，老好吃。

其实，买了一袋秋葵，7两左右，吃了一天。早浪就是伊，水焯熟，横切成小星星，打三只蛋，摆盐、胡椒粉、油各适量，一道打匀，煎成厚蛋烧，腊腊黄个蛋卷里，嵌仔一只只小星星。

对于交关上海人来讲，秋葵勿算是顶顶熟悉个蔬菜；所以，处理起来有点犯难，其实只要记牢几点：一是用小刀沿蒂削一圈，蒂也是好吃个；二是用盐擦一擦，腌一歇，去脱外表一层绒毛，肉质更入味；三是假使勿生吃，秋葵是要滚水里焯一焯个。焯水前头，用牙签辣秋葵身浪戳几只小洞，否则焯熟个秋葵会皱起来。水里摆点盐、淋点油，拎出来冷透。

搿天中午，取10根秋葵，用上头讲个三个步骤处理好，然后清炒。

备点姜丝、鲍鱼汁、油、盐；开油镬，秋葵摆下去煸炒；因为已经焯过水，为保持炒好后个颜色碧绿生青，要开大火，动作要快，稍稍煸炒，加入盐、鲍鱼汁，稍许清水，再开大火烧到汁水收干，就可以盛出来，撒一点点姜丝点缀一下，就好了呀。