闲话剥毛豆

文/吴 毓

朋友送来三斤毛豆，连壳个，傍晚闲下来辰光，我摊开马甲袋开始剥毛豆。现在已经勿大剥毛豆了，勿但吃力，还浪费辰光，关键是还要有指甲。老公讲伊刚剪修过指甲，肯定是勿会来剥毛豆个，所以今朝剥毛豆就是我个事体了。我其实勿大欢喜剥毛豆，剥过毛豆，指甲里就会变龌龊，汏也汏勿清爽。听人家讲现在剥毛豆有了神奇指甲套，不锈钢制作，勿晓得是勿是好用。

小辰光剥毛豆是经常做个事体，我七八岁辰光，就是阿爸姆妈做家务个好帮手，饭桌浪响吃个毛豆子，大多是我一粒粒剥出来个。剥毛豆要有耐心，老公讲过伊小辰光剥毛豆个事体，伊剥脱一歇，就呒没耐心了，拿呒没剥好个毛豆勿管三七廿一侪倒辣豆壳里向，自家偷偷交出门白相去了。想想埃歇辰光伊个爷娘肯定老心痛个。我勿像伊介调皮，我是个懂事体个乖小囡，剥过多少次毛豆数也数勿清爽，每次侪是认认真真个。老公自从结婚后做了奶爸，当了父亲，就自觉担任屋里向个伙头军。有次单位同事突然来我屋里向，老公正好赤膊坐辣小板凳浪专心剥毛豆，后来就辣阿拉单位里向传为美谈。

虽然现在大家侪勿大愿意自家剥毛豆了，但要吃毛豆，总归要有人去剥。每次去菜场买菜，总能看见称菜个老板娘一边卖菜，空下来就抓紧辰光剥毛豆。剥好个毛豆卖价高一点，买个人勿少。毛豆是我喜欢吃个小菜，但去菜场买毛豆我老是会想，买剥好个还是呒没剥好个。有辰光想想，反正已经退休了，闲着也是闲着，剥剥毛豆，听听音乐，也是休闲个快乐辰光，上海闲话叫解解恹气。

姆妈其实不大会做家务事，我结婚以后，伊来我屋里向，帮衬我最多个事体就是剥毛豆。伊常常剥好一袋又一袋毛豆，用保鲜袋装好，放到冰箱里，让我慢慢交吃。姆妈剥个毛豆搭仔买来个勿一样，因为伊会拿豆荚里个一层薄翳也剥出来，按伊个讲法，搿层薄翳最吊鲜味，丢脱搿层薄翳，毛豆就呒没味道了。

前几年姆妈进了养老院，脑经也勿灵光了，隔三差五去看望伊，经常看到伊搭仔几个老太太辣食堂里剥毛豆、剥蚕豆，姆妈一如既往个认真专心。据养老院工作人员讲，让老人剥豆是让伊拉活动活动手指，延缓头脑退化。想到迭些，正勒剥毛豆个我心情轻松起来，多动动手指还可防止脑部衰老退化呢，闲来还是应该多剥剥毛豆！