“燕子”邻居

微信扫码看视频听钱程沪语朗读

◆ 薛鲁光

前几天又去看了王丹凤主演个《护士日记》搭仔《女理发师》两部电影。上个世纪六七十年代，我与王丹凤是邻居，侪住辣陕南邨个一幢楼房里。阿拉屋里住勒三楼，伊屋里住勒二楼。每次辣楼道里碰着，我叫伊丹凤阿姨。

生活里个丹凤阿姨一直保持普通人个本色，别人主动搭伊打招呼，丹凤阿姨就会热情寒暄，一点也呒没电影明星个架子。记得当年弄堂里经常搞爱国卫生活动，丹凤阿姨侪会积极参与。有一天，一早就有人辣弄堂里喊：“居民同志们，每家出一个人打扫卫生，到弄堂里来。”隔仔一歇歇，丹凤阿姨就穿仔一身工作服，套仔一副袖套，穿仔一双套鞋，拎仔一只铅桶，下楼来了。我同丹凤阿姨搭档，一道清理阴沟。伊先用铅桶接水，用水冲洗。我用一把竹扫帚，拿阴沟里个垃圾扫出来，丹凤阿姨再用一把火钳分拣垃圾。覅看伊是电影明星，做起各种粗生活斜气熟练。看我感到惊讶，丹凤阿姨就讲：阿拉演员为了演好角色，经常要到各行各业“下生活”，辣弄堂里搞卫生也是“下生活”个机会呀！

记得《护士日记》上映以后，丹凤阿姨因出演简素华而名声大噪。有一次，陕南邨居委要办一场文娱晚会，来请丹凤阿姨参加演出，伊一口答应。根据节目安排，丹凤阿姨最后一个出场，伊穿仔绣花边个白色连衣裙，上台第一句就是搭观众互动：大家要看我表演啥？一记头就引得现场气氛热闹起来。听到勿少人提议唱《小燕子》，丹凤阿姨就讲伊不是学声乐个，怕唱勿好。现场个“导演”马上打趣：就是要勿会声乐个人唱。丹凤阿姨笑嘻嘻讲：侬是存心要我穿帮出洋相啊。

说归说，唱归唱，丹凤阿姨还是唱起了《小燕子》。其中歌词我一直记得：“小燕子，穿花衣，年年春天来这里，我问燕子为啥来，燕子说，这里个春天最美丽……”一歇歇现场观众也一道跟唱起来，欢快个旋律辣辣空气里回荡，大家侪斜气开心，纷纷要求居委多搞搿种活动，最好每年侪搞。

有一次老师布置写作文，题目是《我的邻居》。我觉得丹凤阿姨值得写一写。下楼敲门，丹凤阿姨个老公柳叔叔请我进了房间。走进伊拉屋里，第一眼就看到一架黑颜色个大钢琴，旁边台子浪还有一台留声机，房间里收捉得干干净净，墙壁浪向挂个结婚照也拍得斜气好看。我说明来意，想请丹凤阿姨帮忙，伊满足了我个要求，有问必答。

我问丹凤阿姨：侬电影拍得介好，是勿是因为侬特别聪明，所以演啥像啥？丹凤阿姨听了哈哈大笑，讲伊因为阿爸喜欢看地方戏，伊小辰光就跟仔阿爸到处看戏，所以对演戏特别感兴趣。后来伊又欢喜看电影，还从画报浪剪下周璇、袁美云、胡蝶、阮玲玉、陈云裳等人演个电影剧照，贴辣辣自家房间个墙壁浪，想象自家有一天也能像伊拉一样。电影演员舒丽娟也是伊个邻居，晓得伊喜欢电影，经常带伊到片场去。呒没想到美梦成真，丹凤阿姨被导演朱石麟看中，从此走上了演艺之路。

一番问答，我写出来个作文言之有物，受到了老师个称赞。丹凤阿姨个善良美丽也深深印刻勒勒我个心里。