汤面、煨面与拌面

◆ 沈一珠

简简单单个面条放到全国各地就有各种各样个吃法。

上海人欢喜个咸菜肉丝面，大多数是清汤面，只不过，看上去清水晃荡，吃起来倒是厚笃笃有内容，因为大多数面店里暗暗交侪有一镬子骨头汤托底；上头摆点浇头，欢喜啥摆啥，可以多份，一样或者勿一样，灵活机动；也有考究个面馆，一碗面条，一碟浇头，两样物事保持距离感。

杭州人欢喜片儿川，传统个侪是煨面，浇头炒好备用，再开油镬，顶好是摆一笃猪油，加片儿川，加水里撩过个面，一道用文火煨透，面条软而勿烂，汤汁水乳交融；迭种滋味，跟元代《我侬词》个意境有得一拼，简单讲就是“我泥中有你，你泥中有我”。

前一腔到山西白相，发现山西人个刀削面大多是拌面。传说里向头顶一坨面，挥刀向头削面片个场景呒没看见，倒是常常看到面店门口架一口大镬子，一人手捧一坨面，用一只小小个刨子，拿面片直接刨进镬子里，翻滚片刻捞到碗里，加上浇头，面片质地硬扎，卤汁薄薄交裹勒面片浪。

平遥城里陪阿拉白相个女导游讲，伊拉平常一家门平常吃饭辰光就是，炒一两盆菜，下一盆面，菜面拌一拌，一人端一碗就好。至于山西人有多少欢喜面食？举只例子。

去黄河壶口兜一圈——搿一兜就是来去各300多公里——之后夜里就直接住平遥古城了。想好了住古城里，因为夜里还好勒古城里荡荡吃吃；也想好了住城门附近，因为阿拉包个车子勿能进古城，进进出出走到城门口方便点，所以，隔日就订好了一家名叫“静园”个民宿，也是因为欢喜迭个名字。后来才晓得，城门口到静园大约10分钟路程，而且民宿老板还会用电瓶车免费接送。

静园蛮大，据说原来是一家票号，三进院子，后两进是二层楼，蛮气派。老板是一个三十来岁个小伙子，戴副眼镜，比较老派个灰调子夹克配深色裤子，看上去像一个中学老师，民宿里向只有员工勿多，侪是差勿多年纪个年轻人，各忙各个，安安静静。

第三天回太原，因为行程有点紧凑，司机希望阿拉早浪8点钟出城，偏偏古城里个电瓶车要8点半上班；跟老板商量，老板想了想，讲：我来开车子送过去。

早浪搿一小段路浪，听老板搿能讲：我是勒天津读个大学，天天吃米饭，实在吃勿惯，忒想念家乡个面了；大学毕业，立即卷铺盖回老家；阿拉迭爿店开了三四年了，店里迭点人也侪是山西个。

其实勒古城白相个辰光，同勿少开店个人攀谈，问起是啥地方人，发现大多数是山西本地人。或许，侪是离不了迭口面？