白相康乐球

◆ 陈祖龙

小辰光，我顶欢喜打康乐球，是当年街道少年之家个康乐球“大王”。埃歇辰光，欢喜打康乐球个人斜气多，勿仅阿拉小朋友欢喜，交关小青年也乐此不疲。平常白相要排队，输了就要让位。我经常可以一打半天勿下台。辣弄堂里“独孤求败”个我开始转战马路边个康乐球摊，寻高手“比武”。到迭种康乐球摊白相是需要付钞票拨摊主个，一般两个人打比赛，啥人输脱啥人出铜钿。有辰光寻勿着高手，就搭康乐球摊主“对开”，输了付钞票，赢了免费，居然输少赢多。

1967年，我刚刚读初中。一天，阿拉屋里对面个国营饭店忽然闹猛起来，我去轧闹猛，发现有一批旧家具之类个二手物资勒了饭店大堂里摆摊出售。红木家具、首饰衣料之类个物事我勿感兴趣，一套康乐球深深吸引了我。从小就欢喜打康乐球个我从来呒没看到过介漂亮个康乐球盘，球盘用紫褐色木料制作，打磨得油光水滑，配了4根枪棒、29粒“球子”，一应俱全。一看价签，10元！我连忙奔到屋里，央求姆妈从拮据个小菜铜钿里抠出5元，又跑了几个要好同学屋里，侬五角，伊一元，凑满5元，马上就去拿迭套康乐球买下来。

之后个几十年里，迭套康乐球带拨我交关快乐。老早住房狭小，我拿球盘朝弄堂里一摆，同学三三两两聚拢来，白相得不亦乐乎。天黑了，吃过夜饭，还要拿球盘搬到路灯下头继续挑灯夜战……后来住房宽敞了，有同事朋友来屋里白相聚餐，酒酣耳热之际，我拿康乐球朝客厅当中一摆，照样搭同事朋友“聊发少年狂”，开心得好像一记头穿越到少年时代。

前几天，一位勒了家具行当经营多年个朋友来屋里白相，看到搿套康乐球斜气感兴趣，据伊讲，迭套康乐球个球盘搭仔枪棒、球子，侪是老好个红木制作个，估计是老底子“大户人家”少爷小开白相个物事，假使我肯割爱，伊愿意重金收购。我婉拒了。毕竟迭套康乐球陪伴我度过几十年岁月，其中个快乐搭仔回忆勿是一点钞票能比个。