光明食堂搭仔M咖啡

◆ 沈一珠

姆妈老房子个居委会小刘打电话来讲，申请个一只报警器到了，叫阿拉抽空去拿。问伊拉，啥辰光方便？小刘讲，伊拉11点半吃饭，下半天1点半上班。因为下半天有事体，阿拉只好赶勒11点半前到。

老破小住宅区，居委会办公室门一推开，好几张写字台。一喊小刘，顶靠里一只电脑后头露出一只头来，一面孔阳光，小姑娘长得好看得来，像一个叫勿出名字个女明星。

报警器薄薄交一片，有一红一绿两只键，按绿键，出来一个上海女人个声音：有啥需要帮忙？小刘请对方改一只联系电话。上海女人重复一遍号码，讲：好，马上就改。然后，按红键挂脱。蛮有意思个高科技，对一家头住个老人来讲，碰着要紧要慢个事体，多一个寻求帮助个渠道，蛮好。

迭能一逮，又有机会到水城路光明食堂吃顿饭，之前去过，赤刮辣新个环境，菜也过得去，点了红烧肉、黄瓜炒河虾，还有一只小荤一只蔬菜一碗饭，送紫菜虾皮汤一小碗，一共六十几块，比外头普通饭店吃顿饭要实惠交关。搿趟再去，人更加多了，店堂里坐得扑扑满，有阿姨妈妈勒此地聚餐，也有姆妈带小朋友吃便饭，还有附近上班小青年出来混顿中饭，看看队伍，弯弯曲曲已经要排到门外头去了，至少要排廿几分钟。

想想，吃碗馄饨算了，至少勿需要排队。现包个菜肉馄饨还可以，有点自家屋里个味道。啥人晓得，拨前头一个爷叔插一档，馄饨就迭能卖光最后一碗。问伊拉，为啥勿多包点？买单小弟讲，早浪四五点钟就开始包了……哦，勿晓得是吃个人突然多出来了还是材料预备少了？看看辰光，也就刚刚11点半……

搿末就吃面好了，一份咸菜肉丝面，加一份辣肉面浇头，再加块素鸡，一共37块。辣肉面几乎勿辣，是从前上海人个口味；肉丁烧得倒好像是老年人专供，肉酥是酥得来，一点骨子也呒没。迭能烧法，倒确实是食堂菜个味道。而上海人欢喜吃个辣肉面，肯定不是肉末做个，是腿肉斩成丁，浆好，生炒，微辣，入口嫩而弹，带一点点甜味。

吃饭勿欢喜人太多，就像从前单位里中饭辰光，看到食堂里人多了，就跑到外头饭店里吃，现在还是迭能，社区食堂排队忒长，只好调地方了。否则，饭前要排廿分钟队，吃饭辰光还要看拼桌姆妈随便自家小囡勒对面扭过来扭过去，徒手勒汤碗里抓排骨吃，还要担心汤水溅过来……

既然市场有需求，食堂阿可以多开几家？像现在上海到处侪有个咖啡馆，三步五步就有一爿。有辰光走过一排咖啡店门前，居然会生出一份选择困难。所以，搿天进个迭家M Stand，一是人少，多少是因为受了食堂人多个刺激；二是因为伊拉买两杯咖啡就送一只老好看个杯子；当然，新式特调个咖啡也蛮有意思：咸芝士拿铁，吃一口，觉着是E型咖，外向脾气，芝士香味道煞煞搏搏，咸个甜个一道铺开勒嘴巴里，后劲比较爽；雪蜜乌龙拿铁，就是I型咖，内向性格，乌龙味道要寻，要猜，到最后就剩丝丝蜂蜜味道勒喉咙口，稍许有点点滑腻……

饮料也有性格，跟人一样。