一天一世界 戏中日月长

微信扫码看视频 听钱程沪语朗读

◆ 赵妃蓉

看王家卫导演去年12月31号推出个《繁花》番外篇，别有一番滋味。短短十几分钟，展现了各个主要角色后来个命运，主线是宝总搭仔汪小姐时隔六年以后，因为一只手机重新有了情缘。故事发生个背景是刚刚开张个淮海路巴黎春天。王家卫导演对细节个高度还原，让观众就像是《爱丽丝漫游仙境》里个主角跌进兔子洞一样，马上拨伊营造个光影世界带回到以前个上海。番外篇个第一个镜头是百货公司里一沓纷乱个收据，营业员看到已经付款盖章个收据就快手快脚拿购物袋交拨顾客，结果拿错购物袋就成了男女主角再次碰头个引线。

前一段辰光我辣了屋里打扫卫生，整理物事，居然翻出了勿少当年百盛、太平洋百货、巴黎春天百货个购物袋。埃歇辰光，商场个购物袋大多数侪是印花塑料袋。迭种塑料袋坚固耐用，再加上上头印制精美个名店标志，大家出门荡马路侪喜欢拎迭种袋袋，走辣了马路浪向就是一道流动个风景线，就像现在年轻人欢喜用奶茶袋当随身包一样。

每到了年底，各大百货公司个促销也像现在个“双十一”“双十二”一样，提前半个月就开始预热了，因为促销力度最大个辰光往往是每年最后一天，所以绝大多数人侪是提前到柜台浪向试穿订货，开好付款单，到了年底最后一天，直奔收银台排队付钞票，就可以领取商品了，如果啥人辣迭个辰光用购物卡，一张一张刮密码是要拨所有人翻白眼个。

迭段时间，营业员每天侪要接待交关顾客，最忙个是卖鞋子个营业员，因为鞋子一般侪是摆辣仓库里个，每个顾客有勿同个尺码，营业员就要跑上跑下一趟一趟去拿，等迭个一波顾客离开，还要为其他顾客打包，标好姓名电话，最后一天直接发货，速度就快了。

顾客拿好货品还可以凭收银条去参加商场个活动，一般商场侪喜欢拿活动设辣最高一层，直达电梯里向肯定侪轧满人，所以大多数顾客侪会选择去乘自动扶梯，走过路过各种商铺，说勿定又有看中个物事，就再顺手买一眼，活动设辣了最高一层可以直接提高大家随机消费个概率。迭个方法现在也被电商借得去了，就是你要付款个辰光自动弹出来个“随手买”。

每个商场侪有五六档礼品可以选，还叠加购物券，假使勿想再买了，旁边个“黄牛”马上就会得接盘多余个购物券。商场里里外外侪充满热火朝天个气氛，从店里走出来个人侪是大包小包。埃歇辰光基本呒没私家车，门口出租车个生意好得勿得了……迭种摩肩接踵、衣香鬓影个场景被王家卫导演用短短一组镜头就刻画得鲜活生动，巴黎春天商场门口个埃菲尔铁塔模型让迭个场景更加像一场嘉年华，为迭场流动个视觉盛宴赢得了一个满分开场。迭个一年就是难忘个2000年，懵懂之间就跨进了新世纪……片子快结束个辰光王导讲“一天一世界，戏中日月长”。

眼睛一眨，新世纪就过去了四分之一，听上去漫长个日脚，回想起来像翻书一样快，过好每一个平常日脚就是留住时光个最好方式。