赤豆糯米 养胃健脾

◆ 沈一珠

太阳照辣身浪，暖洋洋，天气蛮好。闲来无事。打开手机里个QQ音乐，随便选了柴可夫斯基个《D大调小提琴协奏曲·第一乐章》，蛮熟个，浅浅交还记得，1878年，柴可夫斯基因为婚姻问题，日脚过得老勿爽，幸亏有梅克夫人相帮，让伊走出危机，结交了新朋友，又到瑞士去住了一腔。用现在闲话讲起来，有了迭种治愈环境，心情勿错，创作也顺当，也就用了廿几天，完成了迭首曲子。

想想也蛮有意思，迭首曲子首次演出勿成功，当时有专家讲，民族色彩太结棍，勿符合当时个音乐传统；啥人想到，到了现在，已经变成“越是民族个就越是世界个”。

搿天上半日，柴可夫斯基之后是莫扎特《D大调嬉游曲》、巴赫的《a小调第一小提琴协奏曲》、傅聪弹奏个《纪念帕格尼尼》，还有《加布里埃尔的双簧管》《爱尔兰组曲》……明白了，看似杂乱无章个排列，其实侪是平常日脚听过个，大数据帮侬记牢了，寻着机会再放出来听听，让侬勿忘记，自家曾经个欢喜。

所以讲，样样事体侪是有迹可循，吃食也一样，传统讲法就是“依时令而食”。比方讲到了冬天，就要防寒保暖，穿得厚实点，吃得暖热点，来一碗赤豆糯米饭。

准备赤豆、糯米各一份，分量根据人数多少、胃口大小自家定，比例顶好是一比一；其他，有黑芝麻就准备一小把，呒没也就算了；猪油或黄油或其他植物油，以及盐少许。

第一步，赤豆泡一个钟头左右，镬子里加适量水，烧开，10分钟左右关火备用。

第二步，糯米淘好沥干，开油镬摆猪油、盐各少许，小火翻炒到糯米有一点点焦黄，赤豆连汤一道倒入（欢喜吃软饭个，水可以多放点），盖上镬盖，小火焖到饭熟就可以盛出来了。

第三步，勿摆油，炒锅里撒一小把芝麻，小火炒，十几秒就好。其实，灶披间可以常备点熟芝麻，凉拌菠菜或是热炒点啥，上桌前头撒点芝麻，增加口感，据说还可以补钙。

最后，炒香个芝麻撒辣糯米赤豆饭浪，香喷喷，开吃。