经典年菜“素什锦”

◆ 佘建民

过年辰光，老开心个日脚，挂灯笼，贴对联，到处喜气洋洋。阿拉屋里就会拿出准备好个食材，烧一桌好小菜，连小菜名字也斜气喜庆。比方讲，平常辰光，平平常常一道炒素，过年辰光就勿叫炒素了，要叫“素什锦”。素什锦个“什”字虽然加了单人旁，读音还是“十”，有十全十美个寓意；“锦”嘛，本身是指有颜色花纹斜气漂亮个丝织品，后来引申出美好个意思，金字旁又搭财气搭界，更加喜庆。

辣了阿拉屋里向，“素什锦”算是经典年菜。老早辰光，物资供应紧张，荤菜主要靠计划供应，但过年辰光，“素什锦”要个食材，像木耳、黄花菜（也叫金针菜）、烤麸、慈姑、荸荠（上海闲话叫地梨）还是比较好买个，加上过年辰光勒了外地工作个小囡赶回来团圆，伊拉侪会带勿少花生、青豆、红枣之类土特产回来，食材还是比较丰富个。

当年姆妈是屋里向个主厨，“素什锦”是伊最拿手个小菜之一。除夕夜里向，年夜饭必有个蛋饺、肉圆、笋干烧肉老早烧好了，只有素什锦要等年夜饭吃到高潮个辰光现炒。当然烧素什锦个木耳肯定已经泡发好了，金针菜也已经汏清爽、切好，青豆、慈姑、花生米、红枣统统已经烧熟，只要镬子里加点油，拿搿点配菜放进去翻炒就可以了。

因为大部分食材是预先烧熟个半成品，所以只需要急火快炒就可以了。出锅前头，再淋点酱油，浇点香醋，装盘，再滴点麻油，撒点切碎个青蒜，一盘色香味形俱全个素什锦就可以上桌了。搿道素什锦上桌特别受欢迎，也是当年过年辰光少数一顿吃光个小菜。

其实烧素什锦个食材蛮简单，掌握好是全素，勿带一丝绿叶菜就好，食材品种呒没多少讲究，烧起来也勿难。我结婚以后，妻子呒没花多少辰光就跟我姆妈学会了烧法，逢年过节回娘家总归要炒一盆素什锦，引得丈人、丈母娘搭仔兄弟姐妹好评勿断。