春运之包袋演义

◆ 侯宝良

刚刚过去个春运有几十亿人次出行，大多数人侪会带一只行李箱，可以讲，各种各样个行李箱也是旅途浪个一道风景。勿过么，勒了阿拉搿点老年人个记忆里，印象更深个还是各种各样个包袋。

“包”是指旅行包，“袋”就是指网线袋。当年春运，大家手里拿个侪是大大小小个旅行包，里向放个是替换衣裳、牙刷牙膏之类。至于各种土特产就要用到网线袋了。

当时旅行包是属于比较体面个旅行用品。材质主要有帆布搭仔人造革两种，帆布旅行包结实耐磨，可惜勿防潮。人造革旅行包勿但有皮革质感，而且防潮，包浪向还印有各种图案，但是价格较高。葛末既想用上人造革旅行包，又不想多花钞票，应该哪能办呢？当然是自己动手做了。可以从商店里有卖裁好个人造革面料，回去用缝纫机缝起来，价钿比买成品便宜交关。我就搿能做过好几只旅行包。缝纫机换大号针与粗缝线，需要缝个地方涂点机油润滑，夹进嵌线、装上拉链跟拎襻，踩动缝纫机踏板，一阵“嗒嗒嗒”。最后用铆钉加固受力部位，用硬纸板刻出图案放辣包浪，用白漆一刷。一只像模像样个旅行包就做好了。当年邻居阿三头要去外地工作，想要一只人造革旅行包，伊姆妈觉得价钿贵，我就帮伊做了一只旅行包，伊爱勿释手，一直用到后来返城。

至于网线袋，现在基本浪看勿见了，年轻人是肯定呒没印象个，伊就像端午节小人头颈里挂个“蛋套”放大版，用粗棉线相互交叉编结出来，当年我也编织过，杂货店也有买。伊最大个优点是收纳起来轻便易带，又特别能装东西，缺点是网眼偏大，容易跌落小物事。当年我去十六铺码头送客人，看到一个小年轻用扁担挑仔两只装满物事个面粉袋，结果被人群挤破，物事跌落一地。我手浪正好有只网线袋，送拨伊解决了伊个尴尬。

后来市面浪有了塑料编织袋，俗称“蛇皮袋”，便宜、结实，很快就取代了网线袋、面粉袋和麻袋。再后来有了带密码锁个手提箱，搿能才跟西装革履个行头相配。

到了现在，运动包、登山包取代了旅行包。有车族自驾游，汽车后备箱里能带个东西就更多了。