秋日藕香忆旧日

◆周钰栋

老古闲话讲“不时不食”，秋天天干物燥，甜脆多汁个秋藕，正好是养阴清热、润燥止渴个滋补好物事，所以民间一直有“新采嫩藕胜太医”个讲法。

老早辰光，每趟鲜藕上市，姆妈总归会得买几段胖乎乎个九孔藕。九孔藕买回来，先浸辣清水里，拿软毛刷细细刷干净，再沥干备用。平常辰光伊会烧糖醋藕片，切片以后放进油镬里快炒，出锅前撒点盐、糖、香醋搭葱花，脆嫩爽口又开胃，尝一口，神清气爽。不过当年姆妈最拿手个，还要数糖藕。伊常常讲：九孔藕糯性足，做糖藕最适意。

要做糖藕，先要做好准备工作。头一天夜里就要淘好糯米，辣清水里浸足8个钟头，让糯米吸饱水分。到了第二天做个辰光，先拿浸好个糯米捞出来，沥干水分装辣碗里。拿一段汏清爽个藕，两头各切下来一厘米左右厚个藕片，像“盖头”一样留好；再到水龙头下头，用一根竹筷对牢藕孔，一只只捅过去，边捅边用水冲洗，直到每一只藕孔侪汏得干干净净。

灌糯米最需要耐心。姆妈会拿藕竖起来，藕孔朝上，舀一调羹糯米，慢慢往藕孔里向塞；碰到藕孔小个，伊就会得用筷子拿糯米戳进去。等所有个藕孔灌满糯米，拿之前切下来个“盖头”对准藕个两头盖好，最后用几根牙签拿“盖头”固定辣辣藕浪向。

接下来，姆妈就会得拿出一只大砂锅，拿藕摆进去，加水淹没藕。然后加冰糖，再摆几片生姜，据说可以去藕个“涩气”。大火烧开，转小火慢笃两个钟头。搿个过程当中，姆妈会得经常用筷子去戳一戳藕，感觉足够酥软，藕就炖好了。烧好个藕先勿捞出来，姆妈会得往砂锅里加两调羹红糖，再用小火烧，等红糖化开，糖水变得浓稠，藕也裹上糖色，就可以关火了。藕捞出来摆到盘子里，用刀切成片，再拿砂锅里个糖水浇到藕片浪，撒一点点桂花，糖藕就做好了。

每趟到迭个辰光，一股甜香带着桂花香飘满房间，阿拉兄弟几个侪呒没心想做功课了，一直侪辣辣咽馋唾水，好像人世间个快乐侪辣辣迭个几片糖藕里。

姆妈总是对阿拉讲：甜蜜个日脚，要靠双手慢慢熬出来。现在姆妈虽然离开阿拉了，但是我总是按照伊教阿拉个道理过日脚、做事体。前段辰光，阿拉几个老朋友聚会，讲起各自姆妈做个菜……可惜哪怕是现在个大饭店，也吃勿到记忆里姆妈做菜个味道了。是个呀，当年姆妈做个各种小菜里向有姆妈对阿拉搿点小囡个爱，迭个是其他厨师呒没办法复制个，所以记忆里个味道只能是心里向个一种怀念了。