从“马后”到“钉巴”

◆ 储有明

上世纪三四十年代，上海人个主要娱乐方式是看电影搭仔看戏。1940年，独脚戏创始人之一江笑笑，受郑正秋“文明新戏”启发，办了一个滑稽戏剧团——笑笑剧团。剧团首场“打炮戏”，就把独脚戏段子《火烧豆腐店》改成了多场次、有布景个同名滑稽戏，辣当时也算蛮敢创新个。

之前观众看惯个独脚戏，大多是两个演员“一抖一捧”，全程穿长衫、勿化装、呒没布景；而改编后个滑稽戏不光演员要化装，还有布景，搿份“新奇”吸引来交关观众；再加上笑料扎足、表演生动，结果首演就火了，而且场场满座。

但票房好也引来了流氓眼热。伊拉用“拿开销”（要保护费）当借口，“狮子大开口”，敲江笑笑竹杠，威胁勿给钱就不让江笑笑上台。后台管事急了，只好用梨园界个“切口”（行话）——“马后”来救场。

所谓“马后”，就是后台候场个演员呒没办法准时登场，台浪正辣演个演员就要想办法拖辰光，一直等到候场演员能上台为止。搿办法勿光体现“救场如救火”个梨园戏德，更考验演员个临场应变能力搭基本功。

照原剧本，江笑笑上场前有段交代剧情个时代背景个过场戏，埃歇辰光正是上海个“孤岛时期”，市面混乱物价涨，老百姓日脚老苦个。搿段过场戏先由鲍乐乐扮个豆腐店老板上场，然后是笑嘻嘻扮个乞丐跟上来，用“钉巴”个方式向豆腐店老板讨饭。

所谓“钉巴”就是乞丐会辣闹市大马路旁边个小路浪等，一看到穿得光鲜个老板走过，就从小路窜出来，紧紧“钉牢”老板迭个“靶子”，讨勿到铜钿勿放手。

平常搿段过场戏只演两三分钟，但为了“马后”，鲍乐乐搭笑嘻嘻辣台浪铆足劲，临时编了交关有笑料个台词——乞丐好话讲尽、马屁拍足，老板就是勿肯给钱；老板越晚掏钱，“马后”个辰光就拖得越长。两个人还特意加了老多夸张动作，台下观众笑得肚皮痛，完全呒没发觉演员是故意拖辰光。一直等到后台江笑笑跟流氓讨价还价“讲好斤头”（谈好条件），最后以半价成交、花钱消灾，流氓拿钱走了，江笑笑才化装上台。后来后台管事看手表，发现这段“马后”居然拖了足足廿五分钟，危机总算解了。

呒没想到，搿段台浪临时应急编出来个“卖口”（独脚戏或者滑稽戏里，演员即兴或半即兴个台词表演），因为观众反响好、笑声勿停，从第二天演出开始，就被编导正式编进每场戏里，到后来还成了全剧个“重场戏”。

埃歇辰光上海物价飞涨，演员为了生活，除脱要去剧场演戏，有机会还要去广播电台播音，按观众个电话点播演独脚戏。为了方便听众点播，笑嘻嘻就给搿段临时“卖口”起了个名——“钉巴”。后来，“钉巴”勿光成了滑稽戏《火烧豆腐店》个经典段落，还单独变成了独脚戏个经典段子，传到现在。