弄堂里个光影回忆

◆陈日旭

从小到大，总有几桩事体刻辣记忆里向，对我来讲，再呒没比看自家弄堂拍电影更扎劲个事了。

阿拉弄堂就辣曹家渡闹市口，贴牢沪西电影院，有两个出口：一个通三官堂桥个万航渡后路，一个通长寿路，正好拿电影院包辣当中，分前弄堂、后弄堂。弄堂勿大，门牌勿到百户，住户来自五湖四海，职业更是五花八门，有附近工厂个工人，也有菜场卖菜个、开肉店个、做咸菜个、开电车个……

大概1957年春夏之交个一天下半日，我放学回屋里，走到电影院旁边个前弄堂口，一眼就看到围仔交关人，还用带子拦牢。圈子里停了大卡车，装着发电机、大号灯具，老多人忙进忙出，还有戴纠察臂章个人维持秩序。听讲是拍电影《永不消逝的电波》。正巧楼下邻居“小毛娘”阿婆也辣当纠察，伊一眼看到我，就讲：“迭个小囡是住辣阿拉弄堂里个，让伊进来。”

回到屋里呒没多少辰光，居委会就来通知了：每家每户下半天5点之后侪要关窗拉窗帘，覅探头探脑。我屋里住2号，靠弄堂口，辰光还早，我就跑到楼下天井看闹猛。有一个老伯讲：“迭部电影主角李侠，解放前就辣阿拉弄堂潜伏过！”旁边人马上附和：“是个呀，阿拉弄堂人杂，正好适合做地下工作！”还有消息灵通个讲，弄堂口卖茶叶蛋个阿婆被剧组劝走了，损失由电影厂加倍赔，阿婆开心煞了。

天慢慢暗下来，居委会干部拿喇叭喊大家回去，暂时覅出来。我住辣二楼，窗口可以看到弄堂口，我连夜饭都顾勿上吃，偷偷拉开窗帘缝，眼睛盯牢外面。

过仔一歇，外面就有动静了：交关化装成特务个人从卡车浪跳下来，扛着老长个竹梯子，贼头贼脑朝弄堂里冲。伊拉大概是群众演员，导演觉得伊拉演得勿到位，一个简单动作就重拍了五六遍。

天彻底黑透，弄堂里个路灯亮起来。突然有工作人员拿消防龙头冲弄堂口个弹硌路，意思是刚落过雨。接着一部吉普车开过来，下来几个穿得像军官个人，我一眼就认出来，走辣前面个特务头子就是王心刚！伊上嘴唇贴仔小胡子，梳着西式头，穿棕色皮夹克、戴领带，神气活现，指挥小特务冲进弄堂。旁边一个人头颈浪挂仔马表搭场记板，后来才晓得伊是导演王苹。

可惜孙道临扮个李侠我呒没看到，听说伊个戏份是白天拍个。不过“小毛娘”阿婆被请去做群众演员，辣弄堂里假装汏衣裳，李侠从伊身边走过，这下“小毛娘”也成了电影明星，之后老长一段辰光，侪是弄堂里个茄山河个热门话题。

后来沪西电影院放映迭部电影，每趟散场，总有观众三三两两走到阿拉弄堂口，对照电影里个镜头看实景……阿拉弄堂拍电影个事体，我到现在也呒没忘记脱。