冬日暖阳吃蟹忙

文并图/沈一珠

上半天9点多钟，大闸蟹就送进门了，老快；青壳金毛肚皮雪白，外表看上去，是正宗阳澄湖大闸蟹。

昨日傍晚，微信拨蟹老板，问：下单后，多少辰光好送到？

伊还有点奇怪：今朝下单么，明朝就到了呀。

所以，现在吃点蟹，真是便当，还安全。想想前一抢，有人为了吃蟹，吃辛吃苦苏州跑一埭，结果回到屋里，蟹味道呒没完全散尽，又是测核酸又要隔离，烦煞。

暖冬个早浪，困只懒觉，爬起来，人弄弄清爽，蟹也弄弄清爽。再炒一碗酒香草头，烧一口泡饭，准备好。几只蟹落肚之后，吃一口清爽点嗰，顶好。

蟹上蒸锅，大火蒸20分钟多一点，就可以吃了。

特别关照一声：现在日脚，蟹老结了，蟹又大，要稍许多蒸一歇歇。

吃蟹趁热，蟹拎出摆碟子里，用把吃蟹剪刀，先剪下左右两边总共八只脚；再拿蟹肚皮上一只蟹盖头揭下来，母蟹盖头是圆个，公蟹个盖头是尖个，再顺势将蟹身体从蟹兜里剥出来。

先吃蟹兜，用筷子或是小勺子，拿蟹个胃，阿拉也叫伊沙囊，拣出来，轻轻交拿包辣外头个蟹黄吮清爽，沙囊里是垃圾，不好嘬破，整只掼脱。

再吃蟹身体，先拿蟹个肺剥脱；再拿蟹身体中心部位一只六角形薄片挑出来掼脱，有讲这是蟹心，大寒；也有讲，当年法海拿白娘娘压辣雷峰塔下头，激怒玉皇大帝，派天兵天将去捉伊；法海走投无路，看见一只大闸蟹，只好迓到蟹肚皮里。天兵天将无功而返，结果，法海就一直孵辣蟹肚皮里了。吃蟹，寻法海，也是一趣。

拿蟹身体浪个蟹黄蟹膏拆下来摆蟹兜里，淋点姜醋，连同蟹兜里个蟹黄蟹膏一道吃清爽。

再拎牢蟹钳拿身体一掰两，顺着蟹肉个丝丝缕缕，拿蟹身体吃清爽。

沿仔关节，拿蟹脚蟹钳剪成小段，可以直接蘸点醋嘬出来吃；也可以继续拿脚剪开，挑出肉，摆辣姜醋碟里浸一浸，一道吃。

上海人吃蟹，讲究耐心耐向，切忌乱咬一通，俗称牛吃蟹。

搿天中浪，开始剪第一只蟹脚个辰光，看到窗外个太阳光透过树叶斜下来，辣水泥柱头上画个是60度角，等两只蟹吃好，再看光线，已经变成45度角了。