牵记家乡油松饼

文/史美龙

提起油松饼，老早仔辣郊区生活过个朋友应该比较熟悉，伊是农家土得勿能再土个点心，现在基本浪看勿到了。

做油松饼依托两种食料，分别是面粉、菜油。揉面粉个辰光，勿放发酵粉，勿添膨松剂，勿加增稠剂，完全靠菜油、温水调和，让面粉变成油光锃亮个面团。做好个饼用文火煎烤，随着淋上油个镬子温度升高，饼皮发生裂变，变得蓬松脆香。

隔壁阿毛屋里人丁兴旺，兄弟姐妹六七个，日常开销大，阿毛娘做油松饼就比较做人家，几十只饼个面粉里向只放一盅菜油，再放点细盐杀杀淡气。做起来倒是省心，搓搓圆，压压扁，宝宝也会做。煎好盛出镬子，油松饼瘪塌塌焦斑多，上口感觉硬绷绷，但香味扑鼻，一家门吃得眉开眼笑。阿毛娘讲，迭种油松饼最具本色，最最原汁原味。

埃歇辰光，小囡养得少个人家一般条件比较好，做油松饼就比较讲究。小学同学“泥鳅”屋里弟兄两个，爷娘一工一农，阿爸辣厂里开车，姆妈辣村里种田，屋里日脚过得比较富裕。碰着屋里做油松饼，“泥鳅”就叫我去轧闹猛。伊姆妈做油松饼真是“大手大脚”，红枣、芝麻、绵白糖，还要加点红绿丝、冬瓜糖。伊阿爸经常跑外地，可以勿凭票买到菜油，所以揉面团个辰光放菜油勿惜工本。迭能介做出来个油松饼表面金黄挺括，口感松脆香甜，吃一两只勿过瘾。

当然，阿拉屋里向做个油松饼味道也勿推板。姆妈最欢喜做咸菜干油松饼。咸菜干是自家晒嗰，冷水漂一漂，切碎，放点红糖拌匀。内馅经过高温烘烤，糖分盐分相互交融，浓稠个汁水渗透到薄悠悠个饼皮里，整张油松饼咸甜交加，咸菜干个香味特别浓，加上饼皮里个油香，吃到嘴巴里，牙齿忙得团团转。

现在乡下头做油松饼个人家可以讲凤毛麟角，倒是各种馅饼种类繁多，馅料空前丰富。勿过对我来讲，还是牵记那一张油汪汪个油松饼。