姆妈个津贴牛奶

文/吴毓

上世纪六十年代，姆妈辣新华路第四化纤厂当化验员，化纤厂属于有毒有害工厂，所以工厂每天送一瓶牛奶当作津贴。当时姆妈上下班总归要拎一只黑颜色个人造革皮包，下班回到屋里，包里向除脱一只装馒头搭仔小菜个搪瓷杯，就是一瓶牛奶。夏天辰光，从包里拿出来个牛奶还带着冰箱里拿出来个一阵阵凉气。

埃歇辰光物质供应匮乏，迭瓶牛奶就是阿拉屋里唯一个营养品，姆妈自家从来勿吃，我搭仔阿姐也轮勿到吃，搿瓶牛奶主要拨比我小四岁个弟弟吃，假使弟弟勿吃，牛奶就是阿爸个口福。吃之前，牛奶先要用炉子烧开，每天烧牛奶是我个生活。

埃歇辰光我刚刚十岁出头，特别讨厌烧牛奶，因为烧牛奶要时时刻刻守辣煤饼炉子前头，稍微走神，锅子里向个牛奶就会潽出来，半瓶牛奶就浪费脱了，让姆妈晓得了，伊会心痛嗰。

记忆里，当时个牛奶是装辣一只圆柱形个厚玻璃瓶里，上头盖一层牛皮纸，里向还有一层白颜色个圆形硬板纸封口，掀开硬板纸，里层总会粘附厚厚一层奶油，姆妈就用小调羹刮下来放进牛奶里，每次侪是刮得干干净净。后来，我也学姆妈个样子拿搿层奶油刮下来，放进牛奶里，就看到牛奶上面会漂起一层金黄色个油脂，烧出来个牛奶特别香浓。但不晓得啥原因，我从小就勿欢喜牛奶个味道。或许因为一直勿吃牛奶，我后来得了骨质疏松症。

直到今朝，我仍旧记得那只扁扁个牛奶锅子，烧牛奶后总会辣锅底留一层白颜色个的污渍，汏锅子个辰光要用丝瓜筋用力擦洗，搿也成了我青少年辰光少数记忆深刻个事体之一。

或许是因为弟弟天资聪颖加后天努力，也或许是因为姆妈个津贴牛奶真有效果，弟弟读书成绩邪气好，初二个辰光连跳几级，跳到高中毕业班，参加了1978年个高考，结果以全县第一名个成绩考进上海交通大学，当时弟弟十五岁。迭个就是题外话了。