人间至味 一碗白饭

文并图/沈一珠

到底还是吃米饭长大嗰，即使酒过三巡，白酒、红酒、啤酒，各种滋味，重重叠叠；菜上九道，香椿跑蛋、油焖春笋、春韭炒蚬，绵绵春意，密密匝匝；到最后总归会有人低低讲一声：阿好来碗白饭？往往响应者众。

结果，迭碗白饭总会勾起交关回忆和话题：从前大米几钿一斤？洋籼米如今又让人多少有点牵记？现在新大米到底有多少新？又或者，用啥镬子烧更加好吃？进口镬子里向阿里一只牌子更加好？

所谓锦上添花，讲嗰就是迭种人呀。

早浪起来，晴好，鸟鸣，花香。

只是，迭个春天，疫情不平，心也难平。不如，静静交，中规中矩、照本宣科地烧一碗白饭，权当治愈，疗心。

食料：去年个青浦新米2罐，净水2罐。

做法：首先是量米。米和水个量要精准，反正现在啥地方侪勿好去，就拿量米量水当成上一堂物理实验课：新米是1:1，假使勿是新米，可以是1:1.2。

其次是淘米。第1潽出水要快，稍许淘一淘就拿水倒脱，主要是拿米粒外层可能变质个蛋白质搭仔脂肪冲脱；第2、3、4……淘几趟不重要，淘清爽是要点。假使讲，最初几潽淘米水有点重度雾霾个样子，葛末最后一潽淘米水个清洁程度，应该相当于朝阳初升、晨雾初散个腔调。

淘洗好个米摆辣淘米箩里沥干水，上面盖层沾水后拧干个厨房用纸，放半个钟头。其间，可以打扫一下卫生。另外，搿几天可以准备换季衣裳了。

烧米饭用砂锅当然最好，或者就用一般个复合底汤镬子将就，中火烧滚5分钟，关火，镬子摆炉子上焖20分钟。

有所失误个是，因为接仔一只电话，啰嗦了几句，关火晚了几分钟，结果，镬底饭有点硬。

如此，早饭就是搿能一碗白饭了，米粒分明，晶莹剔透。煎一只溏心荷包蛋，配一碟鱼松。

蛋黄滑腻、鱼松爽脆，香弹不软烂个白米饭就是人间至味。毕竟对阿拉来讲，白米饭是永远吃勿厌嗰。