做事体勿好“碰额角头”

文/钱红春

老张今年七十多岁，有一天伊辣屋里换灯泡，勿当心从凳子浪掼下来，左脚腕粉碎性骨折。经过治疗，辣屋里卧床休养。我去看伊个辰光，伊邪气懊恼嗰对我讲：“侬看看，我老早攀高爬低，汏纱窗、揩空调、拆窗帘，勿晓得多少趟，一眼呒啥，搿趟换只灯泡，掼得介结棍，真是触霉头。”

做事体失策失误或者是做坏脱，上海闲话叫“触霉头”，反过来就叫“碰着额角头”。老张掼成搿副样子，我看主要是伊靠“碰额角头”做事体，觉着老早好做，现在也能够做；老早呒没出纰漏，现在也勿会出纰漏。总个来讲，是对自家个能力估计过高，也是对预期后果抱有盲目乐观。“碰额角头”多少有点投机冒险，经常靠“碰额角头”做事体，早点晚点要出事体。对于阿拉老年人，搿一点尤其重要。

对年轻人来讲，交关事体是人生“头一趟”，做起来比较仔细，做之前也会多看多问，勿会轻易下手。就像小囝学走路，起步辰光两只手侪会举起来，随时做好掼跤个准备。老人就勿一样了，觉着自家经过风雨，见过世面，甚至以前做过类似个事体，所以做起来往往邪气自信。

其实老年人身体能力搭仔记忆能力侪已经严重衰退，过去能做嗰，现在勿一定能做。就算决定要做，也要充分考虑其中个风险，预先做好保护措施。

我拿我搿点想法对老张讲了，伊听了之后对我讲：“侬闲话一眼勿错，年纪大了，做事体勿好‘碰额角头’。”后来我再次去看伊，伊已经能够撑拐杖走路了。伊告诉我，脚腕里向还有几只钢钉，等以后好了还要动手术拿出来。伊对我讲：“搿一趟还算好，只是脚腕掼坏脱，要是头朝下掼下来，就完蛋了。”讲好，伊就哈哈笑。