送货上门老早就有

文/侯宝良

“快递小哥”是当今对快递员的美称，其实搿排业态老早市面浪也有，老早上海滩浪个别行业里也有搿排送货上门的行当。当时马路浪常常能看到有人踏仔一部脚踏车，后头书包架两面各挂一只特制包袋，要么竖起一只大箱子，一看就晓得伊是去送货上门的。

“送药工”，老早病家拿郎中先生开的药方到中药店配药又叫“赎药”。多数人侪拿回来自家煎药，店里也可以代煎药，后来医院中药房也提供搿种方便，还负责送药上门。中药侪要分两趟煎，分头潽、二潽。中药要趁热吃，所以要分别灌辣两只勿同颜色的小型热水瓶里，常吃的病人侪晓得先吃红的是头潽。送药工每天就拨迭眼小热水瓶放进分隔的布袋里，荡辣车子后头送上门并收回隔日的空瓶。隔壁后楼爷叔是双职工日里没人，爷叔就拉自家门口挂只小箱子，像现在订鲜牛奶一样，爷叔上班前拿空瓶放进去，跟送药工合作得相当默契。

“送衣工”，假使侬需要送物事去汏衣裳作坊或者去染坊里染衣裳，也可以关照好地址叫伊拉送回来。送衣工的标配就是辣脚踏车后架子浪固定一只大铁皮箱子，箱子外头还用油漆写明店家招牌、电话咾啥，等于是广告牌一路宣传。搿种侪是大店家，像正章洗染店有汏又有染，还有毛料破洞、丝织品抽丝等织补业务。搿排侪是有铜钿、有身价人家打交道的地方。住辣亭子间里人称“张家里”的单身汉，是文艺界人士，伊每天行头侪要烫得“煞刮挺”，葛牢常常有送衣工上门。一般普通人家是没啥物事要送迭排店里去花销的。

“送煤工”，老底子大部分人家侪烧煤炉，勿是煤球就是煤饼。要是侬屋里灶头间有地方的就多买眼，只要侬先到煤球店付脱钞票，讲好地址、姓啥，送煤工就会送来。大多数人家公用灶间侪“轧”（挤）来兮，只好少买点，用光再买。早前我外公就是送煤工，一竹筐五十斤，掮上肩胛就走。客人要一百斤，就用扁担挑起两只竹筐。要讲吃力就是老房子里楼梯陡、楼道狭窄，搬竹筐用勿出劲，认真的送煤工临走还会帮客人扫清洒落的煤屑。

“饭店堂倌”也要送货上门，当然迭种“跑腿”事体侪是叫“学生意”（学徒）做的。记得老早住辣阿拉前楼人家，常常搓麻将到半夜里，差佣人到老西门大富贵酒楼去叫送夜点心，一般是肉丝汤面或者菜肉馄饨。一歇歇，酒楼就派人送来一只四方形竹篮。送到楼下，前楼人家放只大竹筐下去，拿点心吊上来。因为是老顾客，钞票到第二天来收碗的辰光再付。搿种腔式搭仔现在的“外卖”差勿多。

当前是网购时代，小到零食，大到家具、电器样样侪可以快递。便当么是真便当，勿过么，老早仔兜商店的乐趣也就呒没了。