碱水纽结与牛油果

文并图/沈一珠

讲起法棍，大家侪晓得是法式面包；法棍硬结结，碰着牙齿勿灵光的，有可能咬勿动；有只电影《戆豆先生》，戆豆先生勒面包店里有场戏，打人打到兴头浪，顺手拎起柜台里两根法棍，一顿法棍打得人哇啦哇啦，法棍，也算是名副其实。

讲到德国面包，交关人会想起碱水纽结面包——深茶色外表来自碱水的作用，纽一纽结一结，当中有点像绞起来的手臂。据说“纽结”迭个拉丁词的本意就是手臂；还有就是烤过之后，面包会有爆开的裂痕，有点像阿拉中国的开花馒头。

有种讲法，碱水纽结最早产自德国巴伐利亚地区。据说当时巴伐利亚地区有一个面包师因为一时昏头，拿汏烤盘的碱水当作糖水涂勒纽结面包浪向，结果做出迭种特色面包。有趣的是，关于碱水纽结的原产地还有另外一种讲法——来自德国施瓦本地区。据说有一位面包师做面包时，一只猫跳进烤盘，把烤盘里的面包弹到了碱水里，导致碱水面包就此出世。其实，类似故事世界各地侪有，阿拉国内也勿少，比方讲，鳜鱼因为辰光长，发酵变成臭鳜鱼。再比方讲，朱元璋讨饭辰光吃过的碗头碗脚汤变成“翡翠白玉羹”之类，听听，笑笑。

为啥要讲碱水纽结？因为早浪买了两只。放进烤箱重新加热，顺手拿前两天买的两只牛油果处理一下。摆了两天，牛油果颜色已经从深绿变成深咖啡色了；捏一捏，也勿再是贼骨挺硬了。牛油果横好，用刀绕核切一圈，刀口刚刚碰着核就好，轻轻扭一扭就可以拿牛油果一掰为二；挖出核，用小调羹轻轻交拿果肉刨出来，摆小钵头里，淋点柠檬汁，可以防止果肉氧化；买牛油果辰光搭好的芥末酱搭仔酱油也倒进去；再加点色拉油、盐，继续用调羹拿果肉研碎、搅匀成泥就好。

烘好的纽结打开，掰成段，切开，拿牛油果泥像黄油一样涂上去，合起来，咬一口，哦哟，有百炼钢化为绕指柔的感觉，老好吃。