上海人家的灶披间

文/张福生

讲起上海人家老早的事体，灶披间也是蛮噱嗰。

除脱少数高档公寓里有独用灶披间，大多数里弄人家侪是合用灶披间。勿管独用，还是合用，灶披间侪是当年上海人家酸甜苦辣最浓烈的地方。合用的灶披间各色各样，好一点有专门一只房间，几户人家一道用。推扳点就辣楼梯过道里，几只炉子摆成一排。当年用的炉子要么烧煤球要么烧煤饼，所以各家各户侪要存放煤球、煤饼，又要占用一块地方。一到烧饭辰光，人侪轧了一道，想转身也要当心撞着别人。有邻里关系好的，互相谦让，可以错开烧饭辰光。假使碰着几家邻居互相看勿顺眼，难免针锋相对，大吵三六九，小吵天天有。为点啥？无非就是有人多占地方，或者自家的煤球、煤饼被别人用脱了。埃歇辰光，居委主任事体最多，动勿动就要开调解会，还要请来双方单位的工会干部。真是事体勿大，麻烦勿小。

搿搭插一句，后来老房拆迁，大家侪搬进独门独户新房子，居委主任一下子就轻松了。为啥？住房条件好了，以前搿点事体侪呒没了。再讲了，老早仔灶披间烧饭的日子也过来了，回过头去想想多少勿容易。炉子熄脱生炉子，弄得满房间烟雾腾腾。还有楼道弯弯曲曲，楼梯又窄又陡，年纪轻覅紧，年纪大的人上楼下楼抖抖豁豁，烧顿饭是吃力煞。

其实当年独门独户的人家，虽然可以拿炉子放辣房间里，但是麻烦事体也勿少。毕竟经过几代人繁衍，人口增加了，房子面积勿变，人均面积越来越小。就有人想到门外搭灶披间。灶披间有用砖头砌的，也有用木板钉的，房顶用油毛毡一铺，能用就好。

就是这副卖相的灶披间也勿好随便搭，搿叫违章建筑。当年虽然呒没城管，但是房管所发现搿种搭建也会派人来拆。我记得，老早阿拉屋里也辣门口搭过灶披间，刚刚搭好，里弄干部就上门了，隔仔几天就自家拆脱了。

现在上海二级以下旧里才拆光了。保留下来的老房子抽户改造，专门弄的灶披间几户人家合用，比老早好多了。新公房侪是独门独户，灶披间叫厨房间，灶头烧的是天然气，还有脱排油烟机、料理台、大水斗……同当年的灶披间相比，真是一个天一个地。从灶披间到厨房间的变化可以看出，阿拉上海人的日脚真是芝麻开花节节高。