想起当年开卡丁车

文/冯济民

最近看新闻，奉贤区个上海国际越野赛车场邪气闹猛，一场摩托车越野公开赛吸引来了好几个国家个赛车手，其中还包括青少年选手。搿让我想起十年前开卡丁车个事体。

当时我参加东方网组织个嘉定汽车城一日游，其中有一个精彩亮点，就是开卡丁车。迭对从来呒没开过汽车、已经65岁个我，绝对有眼刺激。一开始想到自家要开仔卡丁车辣赛道浪呼啸疾驶，心里多少有眼吓势势。要勿要开？我有眼犹豫。辣同伴个鼓励下，最后我还是鼓足勇气上了阵，呒没当逃兵。

上海F1赛场个“卡丁车世界”勒上海国际赛车场，被上海F1赛道环抱在内。据介绍，迭是符合F1A国际标准个A级赛道，是中国最好个卡丁车赛道，也是亚洲最具挑战性个卡丁车赛道。赛道全长1.234公里，宽8米到12米，一共有18个挑战性弯道，当时赛道个最高纪录是55秒。

进入“卡丁车世界”后，工作人员首先问阿拉有勿有高血压、心脏病？关照阿拉要拿手机、照相机摆好，围巾也要围好。然后要阿拉勒一张单子浪签名，防止万一出事故发生纠纷。感觉就像签“卖身契”一样，心里真个有眼吓势势。办好手续，每个人侪戴好安全头盔，然后就上阵了。

出发点停仔两排卡丁车，我挑了一辆坐进去。迭个卡丁车车身老低老低个，差勿多已经接近地面了。大家侪坐好以后，工作人员交代开车要领。关键是要记牢，右脚油门，左脚刹车，勿能踏错，也勿要一道踏。全部讲清爽，工作人员就帮阿拉拿车子发动起来。我一踏油门，卡丁车立刻就冲了出去，勒赛道浪风驰电掣个前进。

我虽然从来呒没开过汽车，但毕竟开过多年助动车，路感还是有个。勒直路浪我一脚地板油，全速前进，呼啸而过。勒弯道浪，我松油门，带一点刹车，减速前进，保持平稳。18只弯道全部安全通过。勒规定个8分钟里，我正好跑了4圈，平均2分钟一圈。阿拉一帮人当中，最快个跑了6圈。

终点线旁边，工作人员挥舞小红旗，辣伊个指挥下，我拿车停勒指定个车道浪，一开始个犹豫搭仔吓势势老早就一扫而光。我为自家成功接受搿趟挑战而兴奋。亲历卡丁车拨我最大个感觉是刺激！