春有香椿头 冬有香椿苗

文并图/沈一珠

本来晓得，香椿头是春天里才有个，新芽初绽辰光，紫红嫩叶，顶香顶好吃，等叶子绿了老了，香味淡了，也就呒啥吃头了。

辣农村，香椿树可以种辣房前屋后，今年种下去一棵，几年一过，可能就变成一丛丛。因为香椿树个萌蘖性强，所以也被看成是多子多孙、家族兴旺个象征。

椿树可以长得蛮大，宋代刘敞有一首诗《灵椿馆风折椿树》，开头几句：“野人独爱灵椿馆，馆前灵椿耸危干。风柔雨练三月馀，奕奕中庭荫华伞。”今年春天里向，曾经到苏州三山岛踏青，岛上有交关椿树，走走看看，就可能碰着某个瘦瘦小小个苏州阿婆举根长竹竿，长竿头浪绑把小刀，香喷喷个香椿头落仔一地。搿天夜里个饭台子上就有一盆香椿头炒蛋，简简单单。香椿头独有个味道，初初闻上去，清清淡淡低调得来，细嚼慢咽之后，就觉得着伊香味绵长，回味无穷。

现在晓得，香椿苗是秋冬日脚里也可以有个。现在个聪明人，拿香椿树种子摆勒保持一定温度与湿度个环境里，发出芽头而成——看上去就是迷你版个小豌豆苗，味道还是香椿个味道，仔细闻一闻，稍许有点清淡，毕竟是温室里捂出来个，味道温吞势点也正常。

搿一腔，手机里个买菜应用程序有卖香椿苗，50克一小盒，收作起来稍微有点麻烦，黑擦擦薄料料一笃笃大个籽壳要一只只拣出来；其他就便当煞，细苗苗汏清爽后切成寸段，打三只鸡蛋进去，一点点盐、一点点糖、一点点白醋，一道打匀，倒进七八分热个油镬里，火覅太猛，否则容易烧焦脱，卖相吃口就勿灵了，用炒菜勺轻轻推一推、翻一翻，等蛋液结成块就好盛出来吃了。

也有人欢喜用香椿苗拌皮蛋、拌豆腐干；试下来个体会是，炒蛋更加经典，所谓经典就是勿大会豁边。假使特别欢喜冷拌，可以拿伊当香葱，用一点点提香就好。毕竟，就算是苗，伊还是勿改香椿本色，用油搭仔高温可以中和一点伊个苦涩调性。

其实，一棵又好看又好吃又可以活得长长久久个香椿树，还有一层美好个喻意：长寿。古人欢喜用“椿年”“椿龄”来比喻人个长寿；古人也欢喜用“椿”来比作父亲，与之相提并论个，是一个代表母亲个忘忧之“萱”，比方讲，“椿庭萱室”就是父母个代称，再比方讲，“椿萱并茂”是称颂父母健在个美好。有诗句“知君此去情偏切，堂上椿萱雪满头”（唐牟融《送徐浩》），意思就是，要离家远行了，放勿下白发如雪个父母。