讲起油条故事多

文/侯宝良

讲起上海老早个“油条”，像啥上点年纪个人侪有点故事。那天，我发微信请些朋友来试吃我做个油条，伊拉看了油汪汪、胖乎乎个油条图片，回复侪是点赞或好奇：“油条侬也会做啊！”好像会做油条是一桩稀奇事体。

其实，自家做油条真心勿算难。讲简单点，就是按比例拿面粉、发酵粉、小苏打、盐，还有鸡蛋加水搅一搅，然后掿成面团，醒发几个钟头。等面团胖发到原来个两倍左右，就可以放到台板浪切成小长条，两条合起，筷子一压，就可以放进油锅里了。油条趁热吃才酥脆，冷油条吃口就差了。难怪过去大家拿做事体拖拖拉拉个人叫“老油条”。

油条要趁热吃，就要等朋友们来，关键煎油条要有人帮，一个人负责做面坯，一个人负责开油锅，否则会手忙脚乱。侬看过去卖羌饼、葱油饼、做大饼，一个人就可以了，但是做油条个摊头往往是夫妻两家头搭档。

朋友陆续来了就帮忙，一歇歇金黄个油条就摆到大家面前，边吃边谈，故事就多了。老郑讲：“小辰光吃早饭，有根油条蘸蘸酱油，就算改善伙食了，侬想呀，一块红乳腐四分洋钿，可以拨一家老小吃泡饭，一根油条同样要四分洋钿，只能一家头吃，阿是比较奢侈？

老王讲起油条最扎劲，以前伊隔壁就是早点摊。按伊个讲法，大饼、油条侪是早市面生意，天勿亮就听见摊头浪向叮呤咣啷准备炊具个声音、呼呼啦啦拉风箱个声音，还有一阵阵个油烟气，难免惊扰左邻右舍个美梦，勿过么，大家互相体量，呒没啥人跳出来争争吵吵。生意忙了，还要排队，买油条弄根稻草一扎或者带根筷子一穿，买菜路过个直接搁拉竹篮头里，勿少人买只大饼夹根油条边吃边走。老王小辰光常常去摊头浪帮忙拉风箱，对伊来讲，油条勿稀奇，因为落市辰光，老板会送伊几只烘焦个大饼或者呒没卖出去个回锅油条。

老闵讲，伊小辰光对油条情有独钟，后来上班了，常常辣上班路浪买粢饭包油条，再加点糖，味道邪气好！假使辰光宽裕，还可以买一碗热气腾腾个咸豆浆，里向有剪成小段个油条，还有虾皮和榨菜，大冷天吃得额角头浪冒热气，浑身有劲。后来听说油条里向有铝元素，对身体健康勿利，所以伊拿油条戒掉了。现在“无矾油条”里呒没铝元素，伊隔三差五买一根解解馋。