上海嗲妹妹与蛔虫

◆ 储有明

拿娇滴滴个上海嗲妹妹同腻心来兮个蛔虫摆勒一道讲，阿要煞风景！

假使辰光能够倒流个闲话，倒退到上世纪四十年代，“蛔虫”恰恰是发糯米嗲个上海嗲妹妹顶顶欢喜讲个闲话：“啥人晓得伊真心假心，我又勿是伊肚皮里向个蛔虫！”搿歇辰光，住勒上海西区高档住宅里向个人家，常常欢喜勒了周末举办“家庭派对”，勒了大多数个情况下，是为亲眷朋友当中个适龄男女青年创造见面个机会，希望互相之间能够擦出火花，早一点寻到中意个对象，非诚勿扰。

我个亲眷当中有一位刚刚从英国曼彻斯特学习纺织工程学回国个表哥，标准工科男，有点社交恐惧症；三十岁出头了还没女朋友。勒了一次“家庭派对”浪向，几位年轻女宾当中个一位上海嗲妹妹嗲溜溜个声音拿伊吸引过去。只见搿位上海嗲妹妹穿一件量身定做个乔其纱旗袍，身材娇小，明眸皓齿，明艳赛过电影里个当红女影星。

伊成了搿次家庭派对上个主角，好几位西装革履个男青年侪争先恐后个请伊跳舞。其中一位有点油头粉面个长脚男青年，还半开玩笑半当真个搭伊表白。一下子场面有点尴尬。只见伊不慌不忙从腋下个旗袍盘扣当中抽出一条雪白丝巾，用兰花指轻轻捏牢，半遮半掩樱桃小口，朝“长脚”男青年娇滴滴“啐”了一声。接下来，伊让真丝绢头搭“兰花指头”勒了半空当中划出一条小小弧线，又让白丝巾回到旗袍扣浪，趁势用小鸟依人个姿势，拿大半身体倚靠勒旁边身材高大个女伴身浪，接下来轻启朱唇，嗲声嗲气讲：“啥人晓得伊真心假心，我又勿是伊肚皮里向个蛔虫！”闲话好像是对“长脚”男青年讲个，眼睛却向我表哥搿搭瞄过来瞟过去。表哥啥辰光看到过搿种“腔势”，骨头也酥脱了！

交往一年，表哥向上海嗲妹妹求婚辰光讲个第一句闲话就是：“我真心诚意请侬做我肚皮里向个蛔虫！”埃歇辰光流行“文明结婚”，婚礼进行当中有一个环节是新郞新娘介绍恋爱经过。表哥毕竟吃过洋墨水，精通中英文，智商有点高，但情商就有点低，经勿起婚礼司仪一串连珠炮一样个发问，一勿小心抖出搿段猛料。从此，我个“嗲妹妹”表嫂就有了“蛔虫”个雅号。蛔虫虽然腻心，但上海嗲妹妹口中个“蛔虫”，实实在在有一点“糯米嗲”！