一方水土养一方人

微信扫码看视频听钱程沪语朗读

◆ 沈一珠

最近两年常常到杭州去白相，第一是因为好白相，尤其是眼热勿少朋友勒了杭州郊区一个看得见风吹稻浪个山坳里买了房子。其实花铜钿买房子勿稀奇，稀奇个是伊拉觅着了一份花铜钿也买勿着个友好关系：比方，一家包了馄饨，另外三家吃饭个辰光台子浪就多了一碗馄饨；又比方，夜里四家人家集中到一家人家搓麻将，第二天就会一道吃早茶。

又或者，其中两家一时兴起，竟然只用两个礼拜就开了一爿咖啡馆，自家既做老板又做伙计，烧咖啡、泡茶、汏杯子、揩台子，赚不赚铜钿勿晓得，不过听着一句闲话我记得蛮牢：就当是自家屋里一个外挂客厅，有朋友来白相，坐了屋里向总有点拘束，朋友来之前需要收捉房间，朋友回去了还要拿物事归位，蛮费心费力，所以勿如一律侪勒了外挂客厅吃吃喝喝，茄茄山河。想买单就买，想存一笔茶水铜钿勒了店里也蛮好，朋友情谊，细水长流，日脚慢慢过。

第二当然是因为吃。上半天9点钟从上海虹桥高铁站出发，50分钟左右就到了杭州东站，地铁再加网约车，随便哪能，11点钟之前肯定可以到朋友们买房子个山坳里，随便寻一家餐厅，点一碗杭州名点片儿川，滋味清淡，百吃不厌。

顶早听到片儿川，还以为是类似山西个刀削面，后来才晓得，片儿川其实就是一碗面里向个浇头，迭一份浇头有点类似上海人欢喜个咸菜笋丝肉丝。只不过，片儿川顾名思义，用个是肉片、笋片。顶早辰光个烧法是两样物事摆勒了水里汆熟，再油炒，迭个是区别之一。区别之两是配菜，上海人用咸菜，杭州人用倒笃菜。咸菜是用雪里蕻摆勒了甏里腌制，吃之前拿出来绞干水分，质地比较软烂。倒笃菜用大叶芥菜，腌个辰光，甏要倒过来，让菜自然滗出水，迭能一来，倒笃菜就比较干，吃上去更加有嚼劲。最近勒了一家卖菜网站浪发现一个倒笃菜个平替，芝麻芥菜，假使侬欢喜迭种口感，就可以买来试试。

两种面浇头，一个是肉片、笋片配硬结结个倒笃菜，另一个是肉丝、笋丝配水汪汪个咸菜；所谓一方水土养一方人，具体到面点浪向，就是杭州人有片儿川，上海人有咸菜肉丝面。

其实迭个两样浇头个做法是差勿多个。肉搭笋要么切片要么切丝，准备好以后，咸菜切碎备用；镬子里加油烧热，肉片或者肉丝煸炒到断生盛出来，笋片笋丝摆下去煸透，肉丝、咸菜碎末一道倒下去翻炒均匀，加少许酱油、糖、清水，大火滚一滚，盛出来，就是一份好吃个面浇头了。