阿拉身边个“耀耀”

◆ 侯宝良

前几天下半日，居委里来电话通知：叫我去领一样物事。去了以后才晓得是三楼邻居耀耀妹妹拿伊当志愿者得到个奖品转送拨我。我想伊为啥自家勿送，要让居委转手呢？居委干部看出了我个疑问，笑笑讲：“耀耀就怕侬客气勿肯收，特地要居委代转。”

讲起“耀耀”，伊确实是阿拉生活里个希望之光。我早过古稀之年，妻子勿但年近古稀，而且有视力残疾，自从女儿定居国外，阿拉生活里难免碰到困难。有了困难，妻子勒了微信群里求助，住勒三楼个耀耀就会热心相帮，伊勿止一趟安慰阿拉：“爷叔、阿姨，近邻胜过远亲，有困难随时来寻我。”平常天气有变化或者楼里向有啥情况，伊还会通过微信提醒阿拉：阿姨落雨天外出要当心；明朝楼里清洗水箱，夜里多备点自来水；今朝外头刮大风，呒啥事体少出门……真比自家人还贴心。讲起来我斜气勿好意思，到现在还勿晓得伊个真名，只好拿伊当自家小辈，直呼伊小名“耀耀”。慢慢熟悉了，有一趟我顺便问起，才晓得伊是八零后，跟我女儿同龄，伊阿爸比我大几岁，所以伊叫我“爷叔”，搿就更加亲切了。

耀耀还加了我个微信，为我顺利使用智能家电保驾护航。我平常碰着问题就直接求教，妻子多次责怪我，让我尽量少去麻烦耀耀。后来耀耀晓得了，安慰我讲：迭是增加切磋、学习个机会。勒了伊个指导下，我勿但掌握了各种社交、网购之类个手机应用，还能玩转音频、视频、语音朗读，让老友们刮目相看，侪讲我与时俱进老有所为，啥人晓得迭些成就侪是耀耀个功劳。现在人口老龄化，居家养老离勿开邻里个关心、社区个关照，能有像耀耀搿能个邻居真是福气呀。