我勒农场当炊事员

◆ 冯济民

当年我是老三届学生，拨分配到农场劳动。勒了农田里忙碌一年后，拨调到食堂当了两年炊事员，负责烧菜。

所谓食堂其实只是间草棚（后来盖了瓦房），呒没煤气，也呒没自来水，至于冰箱更勿可能有，只有两只大水缸、几把菜刀搭锅铲、几只盛饭菜个木桶、大盆子，还有几只摆菜个箩筐，迭就是食堂个全部家当了。“硬件”实在简陋。年少气盛个我对此毫勿在意，听了领导一番热情鼓励个闲话就立刻走马上任了。

当时勒连队当炊事员也算是肥缺，勿少人眼热我放下锄头、铁锹，穿上白饭单。但我上岗以后却只觉着辛苦搭吃力，呒没半点轻松。要为全大队三百多人烧饭烧菜，实在让我费尽心机。众口难调且勿讲，副食品供应紧张更让我“巧妇难为无米之炊”。

食堂蔬菜由本队蔬菜班供应，品种少，只能有啥烧啥。豆制品是附近农民做个，但必须用黄豆去调换，队里黄豆少，只能隔三差五调剂了吃。鱼几乎呒没，一年难得吃几趟。蛋也极少，只有猪肉还能买到。每顿饭勿但三四只菜必须烧出来，而且量也一定要控制好。少了勿够吃，多了要浪费。每顿侪是现烧现吃。有辰光勿够吃只好到附近连队去借菜应急。烧菜成本也要掌握好，既勿能亏本，也勿能盈利。我常常是吃了上顿想下顿，过了今朝想明朝。

费心是一方面，劳累也够我受个。烧菜兼采购，一年四季勿管刮风落雨还是酷暑严寒，天勿亮四点多钟就要摸黑起床，带仔隔夜从会计手里借个百来元钞票（当时也算是巨款了），骑上队里个破旧脚踏车，到十几里外个集镇去采购。一路坑坑洼洼，又呒没路灯，掼倒是常事。有辰光落雨，脚踏车勿好踏，我只好赤脚用扁担挑了肉从镇浪走回来。一路泥泞，几趟滑倒，浑身侪湿透了。早浪七八点钟我满载而归，卸下一百多斤猪肉，就开始张罗中饭。中饭忙完，休息一息又要开始忙夜饭。一直要忙到夜里七八点钟，拿食堂里里外外收捉清爽才可以休息。假使碰到场部拖拉机手来队里夜间耕作，还要烧半夜饭摸黑送到田头。一天下来只觉着疲惫勿堪。有辰光水泵坏脱，要一桶一桶从河里挑水，还要跳到冰冷个河里去修水泵。

有人认为勒食堂工作多吃多占勿稀奇，但阿拉当时侪自觉做到开饭后再吃，剩啥吃啥，吃多少记多少，决勿以“权”谋私。大概因为廉洁作风过硬，所以尽管菜烧得勿算好吃，我勒队里还是蛮得人心个。拨第一批发展入团，“五好职工”评比也榜上有名，后来还当了炊事班长。一直到1971年底调回上海，我才脱下了白饭单。当过两年炊事员，迭是我一段难忘个人生经历。