梦里抱个小太阳

微信扫码看视频听钱程沪语朗读

◆ 张呈富

电视剧《繁花》开播已经一年了，但是伊带来个沪语热方兴未艾，教小朋友唱沪语童谣也变得普遍起来。有人提出，让小朋友唱沪语童谣，勿能总是吃老本，葛末哪能创作出既有时代气息又有沪语特色个童谣呢？我忽然想起诗友王成荣。虽然此君离开阿拉已经好几年了，但是伊创作个热情搭仔创作个优秀作品，仍旧让阿拉难以忘怀。

伊个交关童谣作品侪是用沪语写个，久而久之形成了一种朗朗上口、刮辣松脆个沪语风格。伊常常讲，写童谣一定要有“小儿科”个心态，只有深入小朋友个内心世界，才能写出像模像样个物事来。平常伊总是细心观察生活，用小朋友个眼光去捕捉画面，用小朋友个心态来感悟世界。

进入21世纪，国际交流越来越深入，上海勿少地方出现了“外语角”，面对搿种场面，一句民间俗语“黄牛角，水牛角”引发了伊个灵感，创作了童谣《外语角》：“黄牛角，水牛角/叽哩咕噜外语角/侬来讲，我来读/大家走进‘联合国’。”作品刚刚发布，马上就得到了诗友们个称赞，好评如潮，后来还获得了第三届上海市优秀童谣征集活动一等奖。还被慧眼识珠个作曲家谱成曲子，编成舞蹈，搬上了电视屏幕，并勒了社会浪传唱开来，成了小朋友们表演个网红节目。

“夕阳芳草寻常物，解用都是绝妙词”，勒了伊个眼睛里，生活里个小事侪可以“小题大作”，从中寻觅灵感，譬方讲晒被头，是日常生活中最普通勿过个小事体了，经过伊个创作，就变成了一首优美个童谣：“大太阳，晒被子/被子晒得喷喷香/喷喷香，盖身上/暖暖和和真舒畅/真舒畅，做个梦/梦里抱个小太阳。”迭能个描写，勿仅能激发小朋友个想象力，成年人读了觉得也老过念头。

除脱小事体，生活当中个大事件也可以用小视角来写，譬如童谣《建筑工》：“建筑工，顶呱呱/搭起高高脚手架/迎风雨，披彩霞/脚手架里变戏法/不变鸡，不变鸭/变出一群楼娃娃。”大家侪晓得，建造高楼大厦是一桩斜气复杂个工程，到了伊搿搭就拨轻易拿捏，提炼创作，用“变戏法”来表达造楼房，堪称神来之笔。

另外，伊创作搭家庭亲情有关个作品也是绘声绘色，斜气生动，譬如表现母子情深个童谣《小酒窝》：“我有一对小酒窝/小酒窝里甜酒多/甜酒流到哪里去？/流到妈妈心窝窝。”

著名儿童文学大师任溶溶评价伊创作个童谣具有“想象奇妙、音律铿锵、童趣横生、时代感强”个特点。对于有责任、有担当个儿童文学作家来讲，儿童文学是爱个文学，有爱才会得感动，才会得有作品个鲜活生命。

有爱心中才会有光，才会有“梦里抱个小太阳”个萌动和释放，王成荣就是迭能一个心中有爱又有光个人。