初遇“契米秋里”

◆ 沈一珠

前几天，选了一只西班牙风味个西餐厅吃饭，前菜过后，服务员小弟上主菜烤羊排，轻轻交讲了一句：配了契米秋里……加了干辣椒粒，有一点点辣，解腻个。呒没听懂，啥叫“契米秋里”？看看，烤得焦黄油嫩个羊排旁边，小碟子里黑油油个就是沙司呀，当然，阿拉也可以叫伊蘸料。

勿怪人家语速快，也勿怪人家声音轻，只怪自家外语呒没学好，呒没关系，勿懂就问，勿坍台。所以，等小弟再来辰光，就问了，侬刚刚叫伊啥？一边指指羊排旁边个小碟子。小弟放慢语速：契米秋里，有欧芹……巴拉巴拉……阿拉大厨勒阿根廷工作辰光学着个……

哦哟，还是勿大懂，只好现场百度了：chimichurri，西班牙语，也叫伊阿根廷青酱，南美餐桌浪个秘密武器，无论是牛羊肉还是鸡鸭鱼，侪可以用伊调味；做法也勿算难，欧芹、小洋葱、大蒜切碎，加一大调羹披萨草（也叫牛至），现磨几圈粗盐、黑胡椒碎做底味，再加点红酒醋，欢喜辣个，再加点干辣椒碎，灵魂是大量加进去个橄榄油，充分搅拌均匀就OK了。或者，在基本材料保证个前提下，也可以随心所欲加减其他内容。南美人个饮食风格也是细腻调调加自由发挥，跟南美人个足球差勿多，要学会，勿容易……

当然有物事学勿会是正常个，所以到了吃夜饭辰光，还是要回到阿拉自家个饭台子，主菜是白斩鸡。2斤左右处理清爽个鸡，欢喜入味点个，先用细盐擦一遍，备用；大一点镬子里清水加葱姜少许，烧开，鸡摆下去10秒左右，拎出来摆到冷水里激一激，迭个动作重复三趟，一方面是可以让鸡皮变得有弹性，另一方面也是让鸡皮与鸡肉分开一点，当中夹一点点鸡冻顶好；水重新烧开，鸡再摆下去，中小火煨10分钟左右，关火，再焐10分钟左右就好。其实，烧火关火个辰光还是要根据鸡个大小、年龄再凭自家个经验，灵活掌握；总之，最后做出来个白斩鸡需要达到个境界是，既要断生，又正好鲜嫩勿柴。

此地还要有一碟阿拉个蘸料：少许姜、葱花切成末；加糖，最近欢喜用甘蔗红糖；加醋，是山西旅游辰光带回来个黑苦荞陈醋；加酱油，是绍兴老家个豆捞酱油；最后烧点热油浇进去，搅拌均匀就好。其实阿拉个蘸料也是可以自由发挥个，咸甜比例，香料加减，随自家欢喜。

葛末，阿会有人用南美个契米秋里配一碟阿拉个白斩鸡？肯定是有人欢喜有人忧。