过年之前掸遗尘

◆ 周钰栋

老底子，每到过年前头几日，交关人家侪要掸遗尘，拿屋里个上上下下角角落落掸掸清爽，好干干净净过个年。覅看掸遗尘迭桩事体勿算大，要是做起来，可以让一家门忙上忙下大半日。

就拿阿拉屋里来讲，勒了掸遗尘搿日天，阿爸姆妈老清老早就会拿阿拉兄弟姐妹几家头喊起来，叫阿拉吃过早饭就拿床浪向个被头铺盖拿到弄堂里去晒一晒，然后拿床搭仔吃饭个台子移到房间当中，再用报纸盖起来，防止灰尘落上去。接下来，阿爸分配工作，姐姐负责揩玻璃窗，老大拿墙壁搭仔角角落落侪掸清爽，叫我拿囥勒床底下个东西理出来，要保留个东西揩清爽摆好；勿要个东西理出来卖拨废品公司。姆妈负责拿碗橱里个碗、筷、调羹侪放到面盆里用碱水浸泡消毒，然后拿碗橱搬到弄堂里，用板刷沾仔碱水里里外外刷清爽，最后等碗橱干了，再拿汏清爽个餐具摆进去。等阿拉侪忙起来了，阿爸就拎仔一只铅桶，到建筑材料商店去买点熟石灰回来，用清水化开，再摆两只煤球进去（据说搿能粉刷出来个墙壁会比较光亮），然后，伊就套上袖套，戴上用报纸做个帽子，开始用石灰水粉刷墙壁。等墙壁浪个石灰水干了，再一家门动手，拿台子、矮凳侪揩清爽，再拿房间里个地板、灶披间里个水门汀全部用拖畚（拖把）拖清爽，拿所有个家生侪物归原位。到了搿个辰光，阿拉搿点忙得七荤八素个人抬眼一看，总算松一口气，异口同声讲：“像新房间，真个是眼睛一亮！”

可以讲，掸遗尘是上海人迎新年个一种风俗，表达了人们对新一年美好生活个期待。