小辰光弄堂里看电视

文/赵妃蓉

搿趟国庆节，几个朋友一道去看电影《我和我的祖国》，其中“夺冠”搿段大家侪觉得拍得好。辣全部七段故事里向，我也最欢喜搿一段，勿仅拿1984年女排比赛夺冠个情节表现得淋漓尽致，而且整个段落里向弄堂里个气氛刻画得邪气逼真，上海闲话也讲得原汁原味，看个辰光就好像自家一勿当心穿越回小辰光去了。

一开场就有邻居告诉冬冬，夜里要拿电视机搬到弄堂里，今朝有女排决赛。别转身，搿个爷叔就辣对女排个比赛调度评头论足，伊个老婆经过伊身边，告诉伊“好像侬侪晓得一样嗰，侬侪晓得嘛哪能勿请侬去当教练啦？”看到搿搭，就好像听邻居屋里向夫妻个家常对话一样，演得邪气生动。对于呒没搿段经历个人，可能会觉得导演拍得有点夸张，但实际浪导演只勿过辣人物塑造和镜头调度浪向更加突出戏剧性而已，基本浪是忠实还原阿拉小辰光个弄堂生活嗰。

上世纪80年代初，家用电视机个稀奇程度是现在个小朋友呒没办法想象嗰，埃歇辰光啥人家屋里有台电视机，绝对是一桩扎台型个事体，热天乘风凉拿出来大家一道看也是邪气平常个事体。

阿拉屋里买电视机之前，我每天吃好夜饭，第一桩事体就是拿起小矮凳到隔壁院子里去看电视，去得晚了就轮勿到坐第一排了，我搿种身高个小囡，抢勿到第一排位置就啥侪看勿见了，只好听听声音。搞笑个是，埃歇辰光每天看电视看到点啥已经想勿起来了，但是吃好夜饭就要去抢第一排位置个记忆倒是记忆深刻得勿得了。

后来外婆屋里也买了台黑白电视机，9吋嗰，吃好夜饭就像电影里一样，电视机搬到院子里，左邻右舍到辰光侪自觉搬凳子来看，倒是我吃好夜饭勿需要再急吼吼抢位子了，一个前排位置总归有嗰。

电影里电视机天线东倒西歪，引起电视画面忽上忽下，忽左忽右，一弄堂个人头随着画面抖动也歪过来转过去，邪气搞笑。结果冬冬奔上奔下，勿断充当人工天线，一头汗溚溚渧，看得阿拉心里向侪为伊急煞。搿是电影里向故意制造个喜剧效果，真实情况是，当时电视机浪侪有两根拉杆天线，每天看电视之前，调节天线个长度和方向邪气有讲究，有辰光必须要有人用手捏牢天线，画面才会变得清爽。搿个辰光屋里向个人就会推来推去，结果是啥人最想看搿档节目，啥人就只好立辣电视机旁边捏天线。假使空气里湿气重，手捏牢天线会觉得有点麻。

电影里向一整条弄堂、房子里个木头楼梯、老虎窗外头个瓦片、楼顶个晒台侪是真实还原，埃歇辰光是有交关人家会辣晒台浪风干酱猪肉，只勿过当时基本浪呒没人家养狗，辣屋顶和晒台之间跳来跳去个是猫。看到电影里小狗一口叼走固定天线个肉，天线落下来了，电视画面乱七八糟，一弄堂人跟着七歪八牵，电影院里笑声四起。我突然特别想念小辰光，想念和同学一道爬出老虎窗，坐辣屋顶浪向个日脚，屋顶个瓦片散发着白天太阳暴晒个余热，阿拉倒是已经抬起头望着天空开始讨论宇宙个广阔，因为埃歇辰光通过书本、电视节目，阿拉已经懂得世界勿仅仅是阿拉眼门前个弄堂，终有一天，阿拉会离开搿搭，开始自家个生活……