寒露到，赚绩叫

文并图/沈一珠

前两天，到朱家角朋友屋里去白相。吃好夜饭，看好月亮，跟伊拉门前的小河浜、狗尾巴草咾啥告个别，准备回转去了。

有劲口伐，一帮子人走到院子门口辰光，就拨脚下头“唧唧唧”个叫声拉牢裤脚管了：有只赚绩（蟋蟀）喏！借仔天浪锃锃亮个月光，大家一阵手忙脚乱之后，一只“两尾子”（公蟋蟀），就拨装进了一只纸信壳里。

“七月在野，八月在宇。九月在户，十月蟋蟀在我床下”，天气冷了呀，聪明个赚绩应该是想，寻到暖热点个床下头去孵好了。大家稍许讨论一歇，一致决定，迭只“两尾子”交拨张医生夫妻两家头，带到屋里向去，好好交抚养。

张医生夫妻两家头老有劲，虽然住辣上只角，勿过，屋里老有野趣，狗狗猫猫勿去讲伊，花鸟虫鱼养仔交关。一个热天下来，笼子里个叫哥哥，盒子里个金铃子，罐头里个赚绩，一家门，融洽得一天世界。

搿日夜里，张医生辣群里发了只视频：赚绩罐头里，两只“两尾子”拨一根赚绩草一引，开牙了。两家头稍稍互相试探一下后，只看见朱家角散养“两尾子”中气十足，一路高歌猛进；张医生圈养个赚绩马上偃旗息鼓，落荒而逃了。

一阵感慨之后，张医生决定：寻个日脚，还是让朱家角赚绩荣归故里，颐养天年。

唉，就勿晓得迭只赚绩心里是哪能想嗰？伊又为啥会用叫声拉牢阿拉个裤脚管？

勿管哪能，寒露一到，差勿多是深秋了：鸿雁南飞，鸟雀呒没踪影，螊绩躽到啥地方去？只有菊花，又是到了盛开个季节。