煤饼与美饼

文/许德华

从前弄堂人家烧饭烧菜侪离勿开煤球炉，煤球样子跟乒乓球差勿多，但是引火保火勿方便。后来有聪明人发明了烧煤饼（也有称“蜂窝煤”）个煤炉，用起来便当交关。辣煤气呒没普及起来个辰光，大多数上海人侪是搿能生活嗰。

老里八早买煤饼蛮吃力嗰，一只木头方架子上摆20只煤饼，像我屋里人多，一个月要用160只煤饼，可以装满8只木架。我呒没办法一次性拿介许多煤饼运回去，只好分两次买，用店里借个推车推到屋里向摆好。到了今朝我仍旧忘勿脱当年自家十指墨墨黑，读唐诗《卖炭翁》个体会。有人嫌店里卖个现成煤饼价钿贵，就自家动手做，阿拉屋里对门口

个人家就是搿能做嗰。每逢伊拉做煤饼，我侪立辣边浪看闹猛。伊个煤饼模子是两只分开来个圆筒，其中一只圆筒里有12根圆细铁，煤饼12只孔眼就是搿能做出来嗰。

自家做煤饼总是吃力来西，机器做起来又快又好。埃歇辰光煤球店里就有做煤饼个机器，一个戴手套个工人立辣机器前头，脚一蹬一蹬操作，一只只煤饼就从机器里吐出来，做好一批就当场卖拨居民。勿过，我还是欢喜买早就做好个“旧”煤饼，因为新煤饼太湿，需要晾干了才好用，旧煤饼已经干透，回到屋里就可以直接放进炉子里烧。

再后来生活条件好了，家家户户侪用上了煤气和天然气，各种煤炉侪从生活当中消失了。印象中对门邻居拿夹煤饼个火钳、通条还有煤饼模子侪当废铜烂铁卖脱了。

呒没想到迭趟上海旅游节推出一款“煤饼”样子新糕点，是老字号采芝斋改良个五福蛋黄美饼，勿仅拿伊造型改成蜂窝煤个形状，还采用上海对口支援扶贫地区个原生态食材，包括新疆巴楚个特级核桃搭仔红枣，云南文山个黄小豆，再加上花生油、花生酱和少许上海黄酒，研磨调和制成饼皮。内馅则是五香牛肉或山药干贝，再裹上蛋黄，烘烤成一只只卖相好看个小“煤饼”。

从新闻里看到搿条消息，我第二天就赶到成都南路上海旅游纪念品展示中心。喔哟，生意好得勿得了，侪卖光了！营业员建议我试试网购。果然还是网购便当，当天下单、付款，第二天就有快递小哥送货上门。我立马开袋打量：小“煤饼”高2.5厘米，直径5厘米；表面有勿少白芝麻和黑芝麻，还有一股香香个味道；咬一口，味道邪气灵光！